ST Porchow –

SJ Chrósćicy 1:2 (0:0)

Zestawa hosći: Škoda – J. Donat (89. Sćapan), Młynk, Mark, Graf (88. M. Donat), L. Zahrodnik, Handrik, M. Zahrodnik, Bjeńš, Bogusz, Kř. Zahrodnik (90. Mi. Zahrodnik)

W štwórćfinalu wokrjesneho pokala nastupichu Chróšćenjo njedźelu w Porchowje. Tamniša sportowa jednotka hraje klasu niže. Z tym běštej róli jasnje rozdźělenej. Za trenarsku dwójku Chróšćanow Philippa Marka a Feliksa Zahrodnika so personalna situacija wosebje zranjenjow dla přeco hišće polěpšiła njeje. Tuž někotři koparjo z druheho mustwa wupomhachu.

Na twjerdym hrajnišću měještaj wobaj cyłkaj spočatnje ćeže. Tu spytachu wosebje z dołhimi bulemi agěrować. Z tym pak wobě stronje wulce wuspěšnej njeběštej. Tola poněčim mějachu Chróšćenjo prěnje móžnosće. Po kombinaciji přez prawe křidło posłuži Lucian Zahrodnik bratra Maksimiliana w šěsnatce. Jeho třělwu pak škitar před wrotami wotwobara. Krótko na to so Franc Bjeńš přez křidło předrě. Jeho flanka trjechi na Křesćana Zahrodnika, wrotar pak z jeho třělwu přewulke problemy njeměješe.