Hižo wotmołwa na prěnje wulke prašenje běše přednošk: Čehodla je nětko prawy wokomik za zahajenje rewitalizacije serbšćiny, kotraž ma wizionarny zaměr, zo budźe w lěće 2100 sto tysac – serbowacych abo Serbow? W přihoće na lětušu serbsku debatu a w připowědźach prěnjeho zarjadowanja tutoho rjadu stej so wobě wersiji jewiłoj. Na kóncu ma kóždy za sebje rozsudźić, hač so jako Serba definuje. Ale štóž wšědny dźeń serbšćinu w komunikaciji faworizuje, ma dobre wuhlady na to, zo jeho Serbja za Serba maja, chibazo so wón wuraznje jako serbowacy Němc, Čech atd. wuznawa. Na prašenje moderatorki, stawiznarki a sobudźěłaćerki Serbskeho instituta dr. Lubiny Malinkoweje, wotmołwješe běžnje serbowaca wědomostna sobudźěłaćerka wulkoprojekta Domowiny za rewitalizaciju rěče, ZARI, prof. Nicole Dołowy-Rybińska. ­Wona je po informaciji Wikipedije Pólka a praješe: „Smy w dobje žiwi, kotraž je mjeńšinam přichilena, a wjacerěčnosć je dale a bóle připóznata.“ Nimo toho wona šibale přispomni, zo je přeco prawy wokomik za wšo, štož woprawdźe chceš.