Radwor. Na tak mjenowany „mały format“ Serbskeho ludoweho ansambla (SLA) běchu wšitcy zajimcy minjenu so­botu do Radworskeho „Słodeńka“ pře­prošeni – krótki drje, ale lóštny to serbski wječork.

Hibićiwy komponist Jan Cyž bě sej 13 basnjow Tima Meškanka wupytał a na swoje wosebite a znate wašnje hudźbnje zwobraznił. Bjez dźiwa tuž, zo bě program wěnowany 60. narodninam Tima Meš­kanka a 70ćinam Jana Cyža.

Spěwar ansambla Pětr Cyž tute skomponowane basnje lóštnje interpretowaše a repetitor ansambla Paul Bernewitz jeho wustojnje na klawěrje přewodźowaše. Krasny bariton Pětra Cyža lubuju, zaklinči zwjetša jaskrawy, druhdy pak přenapinany a jakny. Snano je tutón mój zaćišć tež mała rumnosć Słodeńka zawinowała, ale koncert tajkeho razu je za intimne wokomiki koncipowany. Tuž radźu spěwarjej, wjace cunich zynkow zatwarić, druhdy konsonanty jasnišo wurjekować a swoju dźiwadźelnisku žiłku hišće bóle wučerpać.