Mustwo sej přećiwo Šwicarskej w Praze złotu medalju wuwojowało
Praha. Čěske mustwo je finalne wubědźowanje lětušeho mišterstwa swěta w lodohokeju dobyło. W Praskim stadionje O2 Arena porazychu hosćićeljo mužow ze Šwicarskeje z 2:0 a zawěsćichu sej swoju sedmu mištersku złotu medalju. 2010 bě so Čecham naposledk zešlachćiło, při mytowanju dobyćerjow na čestnym podesće cyle horjeka stać. Wulke finale pokazachu we wjacorych městach susodneho kraja na wulkich wobrazowkach. Na Praskim Staroměšćanskim naměsće běchu so hižo hodźinu do zahwizda tysacy fanow zetkali. Tam powitachu zahorjeni přiwisnicy zymskeho sporta zašłu póndźelu tež swojich rjekow wokoło trenarja Radima Rulíka. Zarjadowarjo mišterstwa su tohorunja jara spokojom, dokelž běchu w minjenymaj njedźelomaj najwjace wopytowarjow w stawiznach spěšnych wubědźowanjow na lodźe zličili. Woni běchu samo 797 727 zastupnych lisćikow předali.
