Pólske knježerstwo planuje wuchodnu mjezu wobšěrnišo zawěsćić
Waršawa. Wulku kedźbnosć zbudźiło je pólske knježerstwo ze swojim připowědźenjom, mjezu k Běłoruskej a Ruskej wobšěrnišo zawěsćić, zo by kraj přećiwo migrantam a před wojerskim nadpadom Ruskeje škitany był. Program „Škitna tarč wuchod“ budźe najwjetša operacija k zesylnjenju wuchodneje mjezy a wuchodneje flanki NATO po 1945, rjekny zakitowanski minister Władysław Kosiniak-Kamysz minjenu póndźelu we Waršawje. Předwidźane su masiwne twarjenja a bunkry, ale tež wulce moderne systemy stražowanja powětroweho ruma a wotwobaranja trutow, minister rozłoži. „Mamy 700 kilometrow mjezy, z nich 400 k Běłoruskej“, praji zastupowacy minister zakitowanja Cezary Tomczyk. Hišće lětsa chcedźa twarić započeć. Projekt płaći po dotalnym planowanju dźesać miliardow złotych, štož je něhdźe 2,5 miliardow eurow. Po słowach ministerskeho prezidenta Donalda Tuska nadźija so Pólska pjenježneje pomocy EU.
