Dalokoskakar Markus Rehm je sej srjedu štwórty raz złotu medalju při paralympiskich hrach wuskočił. Na swojim dobyću drje nichtó dwělował njeje. Přiwšěm pak dyrbiš tute wočakowanje tež zwoprawdźić. Mnohim druhim sportowcam so to w Parisu poradźiło njeje. Rehm pak přesadźi so kaž woprawdźity champion. Jeho prěni skok (7,83 m) by hižo za dobyće dosahał. Cyłkownje běchu štyri ze šěsć jeho pospytow złota hódne. Na kóncu stejachu 8,13 metrow na tafli. Z tutym wuslědkom přesadźi so wón jasnje přećiwo US-Američanomaj Derekom Loccidentom (slěbro, 7,79 m) a Jarrydom Wallace (bronza, 7,49 m). Druhi Němc, Kölnjan Noah ­Bodelier, bu ze 6,98 metrami šesty.

Hišće lěpje wotrěznychu sportowcy w kolesowanju: Dwójce bronza, jónu slěbro, jónu złoto. Po paralympiskim dobyću Maike Hausbergera a druhim městnje Michaela Teubera docpěštaj tež Annika Zeyen-Giles a Matthias Schindler cil. Z tym zawěsćeštaj sebi městno na podiju.