Prawicarsko-populistiski kurs ANO w Čěskej dale a wuspěšniši

Praha (dpa/SN). Krótko po swojim dobyću w regionalnych wólbach je populistiska opoziciska strona ANO w Čěskej dalši wuspěch žnjała. Skupina něhdyšeho šefa knježerstwa Andreja Babiša dósta při dźělnych wólbach senata njewočakowano najwjace mandatow. W kole rozsudnych wólbow, kotrež so zawčerawšim skónčichu, bu kaž je to stajnje kóždej dwě lěće, jenož třećina cyłkownje 81 městnow w senaće znowa postajena. Wobstejaca liberalno-konserwatiwna wjetšina knježerstwa w druhej komorje parlamenta njebě tuž wohrožena.