Archipel Wonkowne Hebridy (Outer Hebrides) při sewjerozapadnym přibrjohu Šotiskeje, tež Western Isles mjenowane, ma hladajo na rěčnu situaciju kraja ­wosebite městno. Je to dźě kónčina z najwyšim podźělom wužiwarjow keltiskeje rěče – gelšćiny. W tutym zwisku móžemy poziciju a wuznam kupow z katolskej Hornjej Łužicu přirunować.

W lěće 1980 zličichu w tutej jadrowej kónčinje hišće něhdźe 80 procentow gelsce rěčacych. Samo w ludličenju z lěta 2011 mějachu snadnu wjetšinu (52 procentow). Po datach z lěta 2022 pak je jich podźěl prěni raz scyła pod połojcu spadnył – na 45 procentow.

Na tamnym boku je po datach z lěta 2022 w Šotiskej cyłkownje 69 710 gelsce rěčacych, dalšich 60 000 wosobow je „wěste znajomosće“ gelšćiny zapodało. To je wo 22 procentow wjace hač w lěće 2011. Tutón rozrost hódnoća rěčni planowarjo jako wurazny wuspěch. Přiběraca ličba rěčacych je wuslědk zesylnjenja gelskeje šulskeje syće. Tež na swětoznatej online-platformje Duolingo, kotraž poskićuje rěčny kursy za wjac hač 30 rěčow, zajimuje so dale a wjace wobdźělnikow za gelšćinu.