Andrzej Duda na dobyće Donalda Trumpa w USA euforisce reagował

Waršawa. Wólby prezidenta USA su w Pólskej – runje tak w Němskej a druhich krajach – wšo postajaca tema w medijach. Do wólbow jewjachu so wobšěrne přepytowanja wo pačenej towaršnosći w USA a wo prašenju, što ma Pólska wočakować, budźe-li pak Kamala Harris nowa prezidentka pak Donald Trump nowy prezident. Hinak hač w Němskej pak bě wusměrjenje statneho prezidenta Pólskeje Andrzeja Dudy w tymle zwisku wot wšeho spočatka ­jasne. Hakle před tydźenjemi bě so wón w New Yorku z Trumpom w toho bydlenju zetkał. Tež hewak Duda stajnje zaso potwjerdźowaše, zo přeje sej Trumpa za noweho prezidenta USA. Wotpowědnje euforiske běchu zbožopřeća Dudy, jako so předwčerawšim, srjedu, wólbne do­byće Trumpa wotbłyšćowaše: „Wjele zboža, knježe prezidento. Sće zdokonjeli!“ Medije njejsu přiwšěm na to zabyli, zo bě Andrzej Duda před štyrjomi lětami po dobyću Joewa Bidena sobu jako posledni gratu­lował, a to tež ­jeničce „k dobremu wólbnemu bojej“.