Marek Krawc rozprawja wo aktualnje rozjimanych temach w Čěskej

Praha. Lětsa su ćěkancy z Ukrainy w prěnim štwórćlěće čěskemu statej 5,7 mi­liardow krónow dawkow a dalšich popłatkow wunjesli. To je wjace hač je stat za jich podpěru zwjedł. Rěčnik ministerstwa za dźěło a socialne Jakub Augusta, zdźěli zašłu srjedu, zo rosće financny ­přinošk ukrainskich ćěkancow z kóždym kwartalom. Augusta informowaše dale, zo je jeho ministerstwo mjeztym 150 000 zrěčenjow mjez čěskimi dźěłodawarjemi a Ukrainjanami registrowało. Wot spočatka wójny hač do kónca lětušeho ­awgusta je Čěska ukrainskim ćěkancam nimale 20,7 miliardow krónow we wobłuku humanitarneje a socialneje pomocy płaćiła. Dźeń a mjenje ćěkancow pak trjeba socialnu pomoc, tak zo so suma financneje podpěry znižuje.

Tuchwilu bydli něhdźe 330 000 ukrainskich ćěkancow w Čěskej repu­blice. Z tym hospoduje Čěska nimo ­Němskeje a Pólskeje sobu najwjace Ukrainjanow. Wot spočatka wójny je ­wobydlerstwo Čěskeje ćěkancow dla wo tři procenty rozrostło. Wosebje widźomne je tole w Praze, hdźež bydli 80 000 ­ćeknjenych z Ukrainy.