Do wšěch kutow swěta ponuchał
WŠUDŹEBYŁ we woprawdźitym zmysle słowa je wěsty Miroslav Šnejdar z morawskeje Ostravy bjeze wšeho. Z čistym swědomjom móže wón rjec, zo je wopytał wšitke kraje swěta. Je tež we wšitkich milionowych městach na wšěch kontinentach pobył. Za tónle zaměr dyrbješe pjeć razow do dalokeje Chiny pućować. Dwanaće lět swojeho žiwjenja bě wón na 366 wukrajnych pućowanjach. Bjezmała by so jako swětowy rekordnik do sławneje Guinnessoweje knihi rekordow dóstał, ale w Londonje su wustajeć měli, zo nima wón z Antarktiki wobkrućenja wšitkich statow, kotrež su na njej ze stacijemi zastupjene. Rekord za wopyty wšitkich krajow swěta připisachu za to Američanej, byrnjež tomu wizita Sewjerneje Koreje falowała.
Mało bjezdźěłnych
Praha (ČŽ/K/SN). Kónc junija je w Čěskej kwota bjezdźěłnosće 2,6 procentow wučinjała a tuž runje tak wysoka była kaž w meji. Ze 195 723 dźěło pytacymi wosobami je jich najmjenje wot lěta 1997. Njewobsadźenych dźěłowych městnow bě 30. junija w předewzaćach kraja cyłkownje 342 510. To wozjewja Čěski dźěłowy zarjad. Najmjenje bjezdźěłnych měješe kaž hižo w róžowniku Pardubicski wobwod, mjenujcy jeničce 1,7 procentow. W južnočěskim wobwodźe zniži so kwota z mejskich 1,8 proc. tohorunja na 1,7 proc. Stolica Praha ma wobstajnje 1,9 proc. bjezdźěłnych. Poměrnje najwyša ze 4,2 procentomaj je kwota přeco hišće w Morawsko-šleskim wobwodźe, Ústíski ma jich ze 4,0 procentami jenož wo něšto mało mjenje, mjeztym zo registruje južnomorawski wobwod 3,2 procentaj.
Agentura Centrum za zwěsćowanje zjawneho měnjenja je nastupajo bjezdźěłnosć w juniju wosebite naprašowanje přewjedła. Wulka wjetšina respondentow při tym zwurazni, zo jeje kwota hižo wulce njespadnje. Tři pjećiny Čechow maja za to, zo wjetšina bjezdźěłnych wo dźěło scyła njerodźi.
Spomóžna gesta prezidentki
Nowa hłowa Słowakskeje přeco zaso z nowosćemi překwapja
Bratislava. Wjele rozprawjenjahódneho z politiki so w Słowakskej tuchwilu njestawa – je dźě čas „kisałych kórkow“. Mjeztym zo so zapósłancy parlamenta po „napinacych kokanjach“ na lětnim dowolu wočerstwjeja, nowa prezidentka ani při pražatym słóncu ruce do klina njezłoža. Cyle nawopak, słowakscy ludźo přeco zaso nazhonjeja, zo je z něhdyšej adwokatku čerstwiši politiski wětřik do kraja pod Tatrami zaćahnył. Jako prěnja ze wšěch dotalnych hłowow stata je Zuzana Čaputová njedawno festiwal Gombaszögi Nyári Tábor wopytała. Tele lětnje lěhwo je jako zjimanje wuměłstwowych, sportowych a zabawnych zaběrow přisłušnikow madźarskeje mjeńšiny jedyn z jeje najwjetšich kulturnych podawkow w Słowakskej. Nawoda festiwala Orosz Örs powita wysokeho hosća w jeho maćeršćinje – nowina Denník N ma tónle fakt z teje přičiny za wuzběhnjenjahódny, dokelž na Gombaseku hewak zasadnje žane słowo słowaksce njepiknu – a prezidentka w madźaršćinje wotmołwi, čehodla je sem přijěła.
ANO z minusom
Přiklesk pólskim prawicarjam
Namócnosće w Białystoku zbudźeja rozdźělne reakcije w susodnym kraju
Waršawa. Namócnosće na kromje demonstracije homoseksualnych, biseksualnych a transseksualnych minjenu sobotu w Białystoku su tež cyły tydźeń po podawkach hišće z wažnej temu w pólskich nowinach. Něhdźe 800 ludźi bě z chorhojemi w tučelowych barbach a transparentami po sewjerowuchodnym měsće z něhdźe 300 000 wobydlerjemi ćahnyło, zasadźejo so za runoprawosć splažnych mjeńšin a přećiwo dale trajacej diskriminaciji. Jim bě so nawšě 3 000 přewažnje prawicarskich přećiwnych demonstrantow do puća stajiło. Tući spytachu tučelowy pochod zadźeržeć a mjetachu kamjenje, bleše a zhniłe płody. Tež policistow, kotřiž mějachu demonstraciju škitać, woni nadběhowachu. Zastojnicy zasadźichu popjerowy spray a wjace hač 50 randalowacych zajachu. Podawk bě tež mjezynarodnje kedźbnosć zbudźił.
Staršim nošerjam „pokazać“ chcył
DONJESĆ na Sněžku brěmjo tak ćežke kaž móžno, wo to wubědźuje so w Čěskej kóžde lěto něchto z gildy nošerjow. Lětuše wubědźowanje doby 34lětny Štepan Domorád z Vrchlabi z nowym rekordom, donjeso na najwyšu čěsku horu ćežu 170 kilogramow. Dotalny rekord ze 165,5 kg je z lońšeho awgusta dźeržał Vladimír Hižnay. 191 cm wulki a 104 kg wažacy Domorád je dwaj kilometraj měrjacu trasu wot Šleskeho doma na wjeršk zmištrował za štyri hodźiny a 20 mjeńšin. Njesł je w specielnym krosnje – wone same wažeše 23,5 kg – pakćiki mineralneje wody w cyłkownej waze 146,5 kg. „Wulce mje zwjeseli, zo móžach swój wukon bjez pomocnych srědkow zdokonjeć – brjušnych pasow, wobwjazow kolen abo kijow“, Štepan Domorád rjekny. „Cyłkownje je so mi derje šło, něhdźe poł kilometra před cilom wšak je to započało woprawdźe smjerć ćežke być.“ K jeho skutkej su Domoráda tež nahlady někotrych staršich nošerjow motiwowali, zo młódši njejsu wurjadnym wukonam kmani, dokelž nimaja trěbneje wole, zahoritosće a wutrajnosće. Přikład za tele wubědźowanje bywa skutk Roberta Hofera, kiž bě 1944 na Sněžku za meteorologisku staciju donjesł železnu rołu, wažacu 160 kg.
Rekordny wunošk
Praha (ČŽ/K/SN). Wunošk čěskich awtotwornjow a dodawaćelskich firmow je loni wo 0,8 procentow přibył a rekordnu sumu 1 102 bilionow krónow docpěł. Wunošk finalnych producentow wučinješe 617,5 miliardow krónow, štoz je 0,6 procentow wjac hač 2017. Produkcija w cyłkownej hódnoće 459,9 miliardow krónow je šła na eksport. Tole je Zjednoćenstwo čěskich awtomobilownjow na nowinarskej konferency publikowało. Po hódnoćenju prezidenta zjednoćenstwa Bohdana Wojnara je wunošnosć čěskeho awtopřemysła po pjeć lětach rosta loni najskerje swój wjeršk docpěła. Dalšemu prěkujetej niši róst hospodarstwa a nic naposledk wučerpanosć dźěłowych wikow.
Wuwiće na domjacych awtowikach w prěnim połlěće 2019 Wojnarowe wěšćenje naležnje wobkruća. Wotbytk wosobowych awtow je w prěnimaj kwartalomaj wo cyłe 10,6 procentow spadnył, w juniju samym wo 15,5 procentow. Wot spočatka januara hač do kónca junija bu w Čěskej 128 784 nowych wozydłow registrowanych, w zašłym lěće bě to w samsnym času 143 784 jězdźidłow.
Čaputová a Duda sej přezjednaj
Szydło „kwitowanku“ dóstała
Bywša pólska ministerska prezidentka w Brüsselu znowa přepadnyła
Waršawa. Druhi króć w běhu jenož něšto dnjow je pólska zapósłanča Europskeho parlamenta, bywša ministerska prezidentka Beata Szydło, w Brüsselu zwrěšćiła. Po tym zo běchu ju minjeny tydźeń při wólbach předsydki parlamentariskeje komisije za dźěło a socialne naležnosće wotpokazali, je wona minjenu póndźelu znowa přepadnyła. Szydło bě jako jenička kandidatka hišće raz při wólbach předsydy nastupiła: Tónraz pak je hišće mjenje hłosow dóstała hač při prěnich wólbach. Nowa předsydka gremija je wot wčerawšeho Lucia Ďuriš Nicholsonová ze Słowjenskeje.
Waršawskemu knježerstwu je poražka Szydło jasny dopokaz, zo „europske elity“ zaměrnje přećiwo Pólskej dźěłaja a zo je Szydło wopor tuteje politiki. Nimo toho sej w Brüsselu pólski katolicizm njewaža, kaž to předsyda knježaceje narodnokonserwatiwneje strony Prawo a sprawnosć (PiS), Jarosław Kaczyński, rjekny. Szydło bě za PiS kandidowała.
Stare družiny rostlin wožiwjene
TŘĚCHU rozměrneho twarjenja sobu za wědomostne dźěło wužiwać, tule nowotarsku mysl běchu sobudźěłaćerjo Narodneho ratarskeho muzeja (NRM) w Praze wulahnyli. Na třěše institucije bywa tuž polo z 21 ratarskimi rostlinami, nic někajkimi, ale tajkimi, kajkež su je ludźo něhdy plahowali. Jako cyrobu za swoje zežiwjenje, jako picu za swój skót abo jako surowiznu za rjemjeslniske wudźěłki. Mjez wonymi rostlinami je na přikład tak mjenowane dwuzornko (wědomostne pomjenowanje Triticum dicoccum). Pola tuteje pšeńcy, měwacej dwuzornjate kłóski, jedna so wo jednu z najstaršich žitnych družin, kultiwěrowanej hižo za čas kamjentneje doby. „Nas wjeseli, zo móžemy dźakowano kolegam ze Slědźerskeho wustawa rostlinskeje produkcije (SWRO) wopytowarjam mnohe płody znazornjeć, kotrež dźěći a často ani dorosćeni dźensniši dźeń hižo njeznaja“, praji direktor NRM Milan Jan Půček. Na rozměrnej třěše muzeja nańdźeš dale rožku, wows, ječmjeń, len, hroch, buny, běrny a dalše płody něhdyšich družin, wšo dohromady dwaj dźesatkaj.
