Budyšin (SN/bn). Orchester Serbskeho ludoweho ansambla je minjenu njedźelu prěni z dohromady štyrjoch „Adwentnych koncertow“ wuhotował. Pod nawodom Kathariny Dickopf zahra ćěleso „Swjedźensku hudźbu za smyčkowy orchester“ Helmuta Fryče. Serbsku ludowu hudźbu citowaca twórba njetworješe jenož čućiwy zazběh zarjadowanja, ale hodźi so zdobom jako reminiscenca na před 60 lětami zemrěteho komponista rozumić, kiž słuša k sobuzałožerjam Statneho ansambla za serbsku ludowu kulturu. Slědowacy „Capriccio za komorny oktet“ Jana Rawpa z markantnymi akcentami drjewjanych dujerjow njewotbłyšćuje jako zažne dźěło nowotarstwo, z kotrymž twórc serbsku sinfoniku pozdźišo rewolucioněrowaše. Spisana w tradiciji pózdnjeho 19. lětstotka dopomina skerje na čěsku romantiku – štož njezadźiwa, wšako bě ju Rawp swojim „towaršam pražskeje Serbowki“ wěnował. Mišterska twórba mjenowaneje doby je „Serenada E-dur op. 22“ Antonína Dvořáka. Narodnemu wozrodźenju a wutworjenju typiskeho čěskeho stila polěkowacu kompoziciju interpretowachu hudźbnicy předewšěm w 3. a 5.