To a tamne (21.06.22)
Z awtom swojeho nana je jědnaćelětny hólc do wjacorych awtow zrazył. Do toho běchu wobydlerjo w mecklenburgsko-předpomorskim Wolgasće policiji rozprawjeli, zo jězdźi po bydlenskej štwórći awto z dźěćom za wodźidłom. Krótko po tym zastojnicy awto wuhladachu, kotrež runje do awta prasny. Do toho bě wóz dalšej awće wobškodźił. Za wodźidłom sedźeše woprawdźe dźěćo. Policisća přepodachu hólca nanej, kiž wo jězbje syna ničo njewědźeše. Wěcna škoda: 4 500 eurow.
Mjezsobne popryskanje z wodowymi pistolemi je w Berlinskej lěsnej kupjeli raznu zwadu a na kóncu bijeńcu něhdźe sto ludźi zawiniło. Policija dyrbješe z 13 awtami přijěć. Dwě skupinje młodostnych běštej so mjez sobu popryskałoj a so zwadźiłoj. Jako so zwada přiwótři, druzy wopytowarjo kupjele zapřimnychu. Na kóncu so sto ludźi biješe.
To a tamne (20.06.22)
Natwar Mnichowskeho oktoberskeho swjedźenja su dźensa zahajili. Theresina łuka je wotnětka wulke twarnišćo a zdźěla za pěškow zawrjena. Po třoch lětach chcedźa wot 17. septembra hač do 3. oktobra zaso hosći witać. Minjenej lěće běchu najwjetši ludowy swjedźeń swěta korony dla wotprajili. Literski karan piwa płaći lětsa přerěznje 13,40 eurow.
Něhdźe tysac wopytowarjow je minjeny kónc tydźenja na lětuše 20. mjezynarodne zetkanje Trabantow do Šwikawy přišło. K zakónčenju jědźeše wčera 55 kultowych awtow z časa NDR z tu- a wukraja po nutřkownym měsće. Na wšě 300 Trabantow z Němskeje, Čěskeje, Pólskeje, Słowakskeje, Madźarskeje a Šwicarskeje bě na teren něhdyšeje twornje Trabanta přijěło. Někotři z nich běchu so dołheje čary dla hižo zašo na dompuć podali. Druhich drje je horcota wottrašiła.
To a tamne (17.06.22)
Sławny dwuposchodowy bus swójby hudźbnikow Kelly chcychu dźensa po parkowanišću wopytowarjow w Europaparku Rust ćahnyć – a to z 50 dźěćacymi awtami Bobby-car. Spěwar Joey Kelly je sej 49 pomocnikow wupytał, zo by swětowy rekord nastajił. Institut za rekordy w Němskej chcyše pospyt přewodźeć. Bus waži dźesać tonow. Přičina akcije we wólnočasnym parku su 50. narodniny woblubowaneho čerwjeneho awta, kiž běchu 1972 prěni raz předstajili.
Njewočakowana to spowědź: 31lětny wodźer mopeda je so w badensko-württembergskim Althausenje pola policije přizjewił a zastojnikam wuznał, zo je pjany něhdźe dźesać kilometrow daloko ze swojim jězdźidłom po puću był. Test alkohola wunjese 1,48 promilow. Muža wočakuje chłostanje. „Druhdy napitych moralka přemóže“, policija zdźěli.
To a tamne (16.06.22)
We wopačnym płuwanskim basenku je so młodostny w hornjej Bayerskej wochłódźił. Susod je 16lětneho při kupanju wobkedźbował a policiji informował. Jako zastojnicy přijědźechu, teenager twochny, swoje koleso wostaji stejo. Policajski helikopter, kiž bě druheho zasadźenja dla připadnje w bliskosći, 16lětneho krótko po tym wuhlada. Policisća jeho zajachu. Kupanje wunjese jemu skóržbu ranjenja domjaceho měra dla.
Na wšě 70 porow je w afghaniskej stolicy Kabulu runočasnje kwas swjećiło. Dobroćelska organizacija bě swjedźeń organizowała. Kraj ćerpi pod ćežkej hospodarskej krizu. Mnozy njemóža sej tradicionalnje wulke a drohe swjatočnosće wjace dowolić. Splažne poćahi zwonka mandźelstwa pak njejsu w muslimskim kraju dowolene. Talibanojo su po přewzaću mocy chłostanja za to přiwótřili.
To a tamne (15.06.22)
Ze solarnej energiju wobhospodarjeny mobilny dom šwicarskich slědźerjow je po puću po wšěm swěće a je wčera w badensko-württembergskim Reutlingenje pozastał. Wonkownje mjetelčce napodobnjeny futuristiski dom je dospołnje ze solarnymi panelemi wuhotowany. W 30 kwadratnych metrow wulkim domje je kuchnja, toaleta a duša. Tura domu po swěće ma so 2025 w Parisu skónčić.
Darmotne piwo hač do kónca žiwjenja – za zawjazanje noweho lodohokejoweho trenarja Barryja Trotza za mustwo Winnipeg Jets w USA je lokalna piwarnja zwólniwa so sylnje angažować. Po njewočakowanym wotchadźe dotalneho trenarja loni w decembru chce piwarnja ze swojim poskitkom noweho trenarja Trotza přeswědčić, kak w lokalnym sportowym wusyłanju připowědźi.
To a tamne (14.06.22)
Paducha diesela zajała je policija w hessenskim Diethölztalu. 36lětny bě 160 litrow diesela tankował a prosće wotjěł, bjez toho zo by zapłaćił. Na ćěkancy ignorowaše čerwjenu amplu a zrazy do awta 78lětneho. Paduch na to pěši ćěkaše. Zastojnicy pak jeho dosahnychu. Po tym so wukopa, zo steješe 36lětny pod wliwom alkohola a drogow. Jězbnu dowolnosć tež njeměješe. Připrawjene znamješko k tutomu awtu njesłušeše. Policija trochuje wěcnu škodu na 20 000 eurow. Muž dyrbi nětko z wjacorymi chłostanskimi jednanjemi ličić, policija zdźěli.
Stadło wowcow je konja zapřaha w Glauchauwje w Zwickauskim wokrjesu wustróžiło. Kóń smaleše na to dale a běžeše po skłoninje. Zapřah so skónčnje zwróći. 65lětny pohonč so při tym zrani. 33lětna susodka na zapřahu móžeše w poslednim wokomiku wotskočić.
To a tamne (13.06.22)
Płuwanski marathon na 1 200 kilometrow w Rynje je zahajeny. Joseph Heß z Kamjenicy je sobotu rano do jězora njedaloko šwicarskeho Tujetscha zalězł, kiž maja za žórło rěki. 34lětny chce čaru hač do Rotterdama za 25 dnjow zmištrować a wšědnje hač do dźesać hodźin płuwać. Wjacori kanuća jeho přewodźeja a akciju za dokumentarny film nahrawaja.
Italscy a grjekscy cłownicy su štyrjoch Britow w grjekskim přistawnym měsće Thessaloniki z cyłkownje 300 kilogramami kokaina w hódnoće dźesać milionow eurow lepili a zajeli. Wopojny jěd bě w 260 paketach schowany. Po prěnich dopóznaćach přisłušeja zajeći w starobje 38 do 52 lět kriminelnej organizaciji na Balkanje. Při přepytowanju luksusoweho domu namakachu policisća dalše drogi, pistolu, municiju, wjele pjenjez a wjacore mobilne telefony.
To a tamne (10.06.22)
Francoscy cłownicy su dweju Němcow při zapućowanju do Španiskeje zadźerželi a při kontroli w transporteru štyri aligatory namakali. Přiwołany fachowc za škit zwěrjatow zwěsći, zo jedna so wo družinu aligatorow, za kotruž płaća krute postajenja při mjezach. Dokelž Němcaj žanežkuli dokumenty za zwěrjata njeměještaj, jeju zajachu. Krokodile dowjezechu do zwěrjenca. Zwotkal mužej zwěrjata měještaj a dokal chcyštaj njebu znate.
Borisa Johnsona jako croissant móža sej wobydlerjo Kijewa słodźeć dać. W kofejowni Zavartailo mějachu ideju, so britiskemu premierministrej za wojersku pomoc Wulkeje Britaniskeje k zakitowanju Ukrainy přećiwo Ruskej inwaziji dźakować. Z baiserom a kulku lodu garněrowany croissant „Boris Johnsonjuk“ ma swojoraznu frizuru britiskeho politikarja napodobnić a so derje předawa.
To a tamne (09.06.22)
„Pomhajće! Smy nadpadnjeni“ – z tutym tekstom na displayju je bus po badiskim Endingenje po puću był. Wjacori šoferojo policiju wo tym informowachu. Po tym zo běchu zastojnicy bus zadźerželi, zwěsćichu, zo je šofer busa powěsć mylnje aktiwizował. Po informacijach policije ma najwjace busow za nuzowy pad knefl, kotryž ćichi alarm zawinuje.
Powostanki hoberskeho dinosawriera su slědźerjo na britiskej kupje Isle of Wight namakali. Je to jedyn z najwjetšich hdy w Europje namakanych rubježnych dinosawrierow scyła. Wón bě dlěši hač dźesać metrow. Namakane fosilije – kosće pónoje a rjapa – pochadźeja wot dwunohateho dinosawriera z hłowu krokodila. Namakanka podpěruje hypotezu, zo pochadźa „Spinosawrus“ ze zapadneje Europy. Z pomocu wědomostnych metodow chcedźa nětko starobu zwěrjeća zwěsćić.
To a tamne (08.06.22)
W šnórce wudy zašmjatana pašturlica (Mäusebussard) je w sewjerorynsko-westfalskim Neussu zasadźenje wohnjoweje wobory zawinowała. Ptak bě so we wudźenskej nići nad rěku Erft zamotał a njemóžeše so sam wuswobodźić. Šnóra wisaše w štomje. Wohnjowi wobornicy pašturlicu ze sakom popadnychu a ze šnóry wuswobodźichu.
Wjace hač sto šulerjow a wučerjow z Němskeje su w awstriskim Kleinwalserskim dole z hórskeje nuzy wuchować dyrbjeli. Młodostni w starobje dwanaće do 14 lět z Ludwigshafenskeje kónčiny běchu na hórskej šćežce po puću, kotraž jich techniskim móžnosćam a ćělnym kmanosćam scyła njewotpowědowaše. Jako mjez nimi panika wudyri, wučer hórsku słužbu zazwoni. Ta cyłkownje 107 wosobow z helikopteromaj wuchowa. Dwaj šulerjej so zraništaj.
