To a tamne (26.10.22)
Ataka radikalneje klimoweje skupiny „Poslednja generacija“ na „Sixtinsku madonu“ 23. awgusta w Drježdźanskej galeriji Stari mištrojo je škody we wobjimje wjac hač 10 000 eurow zawinowała. Kóšty restawracije wučinjeja 3 000 do 5 000 eurow, kaž Statne wuměłstwowe zběrki Drježdźany dźensa zdźělichu. K tomu přińdźe hišće strata 7 000 eurow, dokelž dyrbjachu muzej nachwilnje zawrěć. Młoda žona a młody muž běštaj so ze stajnje jednej ruku na ramiku wuměłskeje twórby přilěpiłoj.
Prěni raz po přewróće su so w Drježdźanskej uniwersitnej klinice srjedź awgusta štwórniki narodźili. Sham, Joud, Ahmad a Ayham wčera chorownju wopušćichu. Posledni raz witachu tam w lěće 1984 štwórniki na swět.
To a tamne (25.10.22)
Zo njeby při přichodnym wichoru swoju wopuš zhubił, ma so wjedrowy honač na cyrkwi Božeho spěća w Drježdźanskim měšćanskim dźělu Leubenje zaso stabilizować, tak wozjewi ewangelska cyrkej wčera w Drježdźanach. Pozłoćany honač ma tuž swoje domske wopušćić, zo by w metalowej dźěłarni we Wurzenje nowy woblek dóstał. Wobškodźeny zadni dźěl honača běchu lětsa nalěto při lěće z trutom namakali.
Město pozdatnje pokradnjeneho šmóratka namaka policija w Berlinje pola 31lětneje žony drogi. Kaž policija njedźelu zdźěli, je žona 13lětnemu hólcej šmóratko ze zaka sćahnyła. Mać hólca to widźo wo pomoc wołaše a pasant žonu zadźerža. Zaalarmowana policija na to 31lětnu přepytowaše. Město šmóratka namakachu popjerjowy spray a substancy. Zastojnicy žonu zajachu.
To a tamne (24.10.22)
Předrasćeni jako hotdog abo gladiator – Newyorkske psy a jich wobsedźerjo zetkachu so hižo zawčerawšim we wšelakich kreatiwnych halloweenskich kostimach. Na tak mjenowanym „Tompkins House Halloween Dog Festival“ wobdźělnicy kóždolětneho wubědźowanja swoje předrasćenske kumšty a kreatiwitu dopokazachu. Hišće hač do kónca oktobra móža ludźo wo najlěpšim kostimje wothłosować.
Pašowar bu při zapućowanju do Indiskeje z trjenjemi lepjeny, kotrež bě wón do toho do złota tunknył. Cłowny zarjad w zwjazkowym staće Kerala jeho wučušli, jako mokre rubiška pola potrjecheneho nańdźe, kiž bě z Dubaja do kraja přilećał, kaž nowina w Indiskej minjeny pjatk zdźěli. Kaž zarjady rozprawja, su pašowarjo w Indiskej přeco hibićiwiši a kreatiwniši. Pola lepjeneho muža su cłownicy cyłkownje pjeć „złotych“ trjenjow našli.
To a tamne (21.10.22)
Přemało piwa w karanje mějachu lětsa napadnje husto wopytowarjo Oktoberskeho swjedźenja w Mnichowje. Kaž je přisłušny zarjad zwěsćił, bě w 31 procentach wšitkich kontrolowanych probow přemało piwa w škleńcach. Tajki pad předleži, hdyž je karan napjelnjeny mjenje hač 15 milimetrow pod smužku, kotraž pokaza značku jednoho litra. Na Oktoberskim swjedźenju 2019 bě to hišće 18 procentow wšěch probow.
Na prowizoriske tepjenje z drjewom je šwabske město Stadtbergen pola Augsburga swoju šulu přestajiło. Přičina su wysoke płaćizny za płun. Před šulu steji wot njedawna kontejner ze zatwarjenym tepjenjom za drjewjane třěski. Tepjenski material město z drjewowych wotpadkow same produkuje. Přichodne tři měsacy chcedźa mobilne tepjenje wuspytać a so nadźijeja, zo z nim pjenjezy lutuja.
To a tamne (20.10.22)
Jako prěnja žona je 23lětna Wulkobritaničanka Jasmine Harrison zapadny pobrjóh Wulkeje Britaniskeje hač do sewjerowuchoda Šotiskeje přepłuwała. Wutoru dopłuwa młoda žona nimale 1500 kilometrow dołhu čaru. Spočatk julija bě Harrison startowała a z tři a poł měsaca trajacym dyrdomdejom tež nowy časowy rekord docpěła.
Štóž w indiskej stolicy Neu Delhi hinduistiski swjedźeń swěcow Diwali z wohnjostrojom swjeći, tomu hrozy jastwo. Hižo nakup, ale tež wužiwanje praskadłow móže so z pokutu hač do 200 rupijow (něhdźe 2,50 eurow) a šěsć měsacami jastwa pochłostać. Přičina toho je, zo je poćeženje z drobnym prochom kóžde lěto wokoło swjedźenja Diwali wosebje wysoke a zo je praskańca hłowna přičina toho. Diwali je hinduwam přirunajomnje wažny swjedźeń, kaž mnohim hody.
To a tamne (19.10.22)
Při raciji na wjacorych městnach su zasadźenske mocy cwólbu wotkryli, kotraž je we wulkim stilu falšowane pruwowanske wopisma wobsedźerjam šrótowych awtow předała. Banda je mjez druhim kołk pruwowanskeje organizacije Dekra falšowała. Wjace hač 200 zasadźenych policistow je wutoru rano 17 objektow přepytało a wobšěrne dopokazy sćazało, zdźěli policija w Münsterlandskim Borkenje. Hłownaj podhladnaj buštaj zajataj.
Podhladneho paketa dla buchu dźěle Londonskeje knježerstwoweje štwórće wokoło Downing Street wutoru nachwilnje zawrjene. Po pruwowanju přez specializowanych zastojnikow pak bu paket jako njestrašny zastopnjowany a zawěry zaso zběhnjene. Po rozprawach medijow dyrbjachu něšto stow ludźi mjezowace twarjenja wopušćić. Tež wjacore dróhi běchu za awta a pěškow zašlahane.
To a tamne (18.10.22)
Nimale dwě tonje kokaina je ekwadorska policija sćazała. Droga bě w kontejneru z mórskimi płodami schowana, kotryž bě za transport do Belgiskeje předwidźany, kaž policija póndźelu zdźěli. Zastojnicy wotkrychu mjez tworami 124 kistow kokaina. Podhladneho při wotkryću zajachu. Europa je so naposledk k wjertnišću za wikowanje z drogami wuwiła, dokelž so kontejnery wottam mjenje kontroluja.
Jědojteho hada je wohnjowa wobora w Bremerhavenje popadnyła. Policajska straža wotkry zwěrjo njedźelu mjez kontejnerami. Po informacijach wohnjoweje wobory jednaše so wo jědojteho sewjeroameriskeho hada. Zwěrjenc w Saterlandźe (wokrjes Cloppenburg) ma hada nětko přiwzać. Pochad a wobsedźer běštaj po podaćach póndźelu hišće njejasnaj. Policija pad přepytuje.
To a tamne (17.10.22)
Wosebity poćah k britiskej kralownje Elizabeth II. měješe figura dźěćacych knihow „Paddington Bear“. K 70. róčnicy jeje krónowanja smědźeše bar za mjeztym jara woblubowany animěrowany film do palasta přińć. Po smjerći kralowny połožichu žarowacy nimo kwětkow tež wjace hač 1 000 barikow a Paddingtonow před Buckinghamskim palastom. Tute budu so dźěćacej pomocnej organizaciji darić.
Njeznaći skućićeljo su w Mnichowje muža přelesćili a jemu 40 000 eurow z awta kradnyli. Kaž policija zdźěli, bě 67lětny pjenjezy pjatk na bance wotzběhnył a tute w nachribjetniku transportował. Jako so do awta sydny, klepaštej njeznatej wosobje wo wokno a jeho na na zemi ležace pjećeurowske bankowki skedźbništej. Při tym jedna z wosobow nachribjetnik pokradny. Mužej to pak hakle po něšto mjeńšinach jězby napadny.
To a tamne (14.10.22)
Wotpohladnje do płota zrazył je 57lětny ze swojim awtom w vogtlandskim Reichenbachu. Muž přizjewi so pola policije a twjerdźeše, zo je njeznaty jeho awto wobškodźił. Jako zastojnicy dojědźechu, zhonichu wot swědkow, zo je 57lětny we wokomiku zražki sam za wodźidłom sedźał. Na to narěčany muž to skónčnje přizna. Test alkohola wunjese 1,72 promilow. Nětko dyrbi so wón nimo alkohola tež wudawanja chłostajomneho njeskutka dla zamołwić. Čehodla bě muž wotpohladnje do płota zajěł, njeje znate.
Wjace hač štyri promile alkohola je šofer wosoboweho awta njedaloko Stuttgarta w kreji měł. Po informacijach policije bě wój „jara razantnje a bjez swěcy“ po puću. Do toho bě so žona 51lětneho dohladała, jako tón pjany do awta zalěze. Policisća jeho zadźeržachu a sćazachu jězbnu dowolnosć. Muža wočakuje chłostanje.
To a tamne (13.10.22)
Za wopačnym awtom so schował je paduch pralinow w Kölnje. 27lětny bě do toho w žiwidłowym wobchodźe 25 tyzow worješkowych pralinow do wulkeje plastikoweho měška tyknył a so bjez zapłaćenja zminył. Po tym schowa so mjez parkowacymi awtami. Jedne z awtow pak bě ciwilne jězdźidło policije z dwěmaj zastojnikomaj. Tymaj bě zadźerženje muža podhladne. Nimo toho njeměješe wón kasowy bon za wulke mnóstwo pralinow.
Dokelž njeje ničo přećiwo wulkej ličbje myšow w swojim domje činiła, dyrbi žona w Jendźelskej pokutu płaćić. Najebać skóržby susodow je 73lětna z myšemi kaž z domjacymi zwěrjatami wobchadźała a je picowała. Sudnistwo města Colchester je žonu tohodla k pokuće 1 700 eurow zasudźiło. Nimo toho dyrbi wona kóšty za ponowjenje swojeho socialneho bydlenja w nošerstwje města zarunać.
