To a tamne (22.04.22)
Wobšudnikow wutriksowałoj staj rentnarjej w Hamburgu. Do toho běštaj wopačnej policistaj jimaj 60 000 eurow wotewzałoj, dokelž so pječa paduši na dom seniorow měrja. Jako so skućićeljo znowa za pjenjezami – tónkróć na bance – prašachu, starcaj do toho zwolištaj. Do toho běštaj policiju informowałoj. Při přepodaću pjenjez zastojnicy jebakow zajachu.
Na wšě 150 kilometrow po puću był je dospołnje pjany šofer wosoboweho awta na awtodróze A 19 mjez Berlinom a Baltiskim morjom, doniž jeho policija njezadźerža. Muž, pola kotrehož naměrichu 2,13 promilow alkohola, bě ze swojim wobškodźenym awtom a swojoraznym wašnjom jězdźenja hižo w Braniborskej napadnył. Hakle w Rostockskim wokrjesu so poradźi, jeho zadźeržeć. Při awće zwěsćichu čerstwe wobškodźenja a pytaja tych, kiž buchu wot šofera škodowani.
To a tamne (21.04.22)
Z pomocu mobilneho telefona su pilatko wuchowali, kotrež bě jutry njedźelu do kanalizacije w Bremerhavenje padnyło. Wohnjowi wobornicy z telefonom wołanje kački za młodźatom nahrawachu a w kanalizaciji wothrawachu. Tak móžachu pilo namakać a wuchować. Młode zwěrjo bě do nadróžneho gullyja padnyło, štož pěšcy wobkedźbowachu.
Na kofej, pizzu a solotej wjeseli so němski astronawt Matthias Maurer, kotrehož słužbny čas w swětnišćowej staciji ISS so po šěsć měsacach nachila. Kónc apryla ma so wón na zemju nawróćić. „Wjeselu so jara“, rjekny 52lětny powěsćerni dpa, na wšo to, štož w swětnišćowej staciji njeměješe. Wosebje čerstwa jědź jemu pobrachowaše: čerstwy sad, čerstwa solotej, horca pizza a wočerstwjace napoje. „A wězo na prawy kofej, Latte Macchiato z bitym mlokom horjeka.“
To a tamne (20.04.22)
Wospjet wobkradnjena žona w sewjerorynsko-westfalskim Herne je dekoraciskeho jutrowneho zajaca z nawigaciskim nastrojom wuhotowała a po tutym puću paducha zwěsćiła. Jutrowna dekoracija bě so minjene lěta stajnje zaso z rowa zemrěteho mandźelskeho zhubiła. Tónkróć měješe hornčerski zajac sćelak při sebi. Jako bu dekoracija njedźelu znowa pokradnjena, móžeše 65lětna zhubjeny předmjet w bliskim zahrodkownišću zwěsćić. Policisća pokradnjeneho zajaca pola 72lětneho sćazachu a jeho žonje wróćichu. Paducha wobskorža.
Woheń na dworje zakładneje šule je w Hirschfelde njedaloko Zhorjelca zasadźenje policije zawinował. Młodostni běchu woheń zadźěłali a samo štom pušćili, jako bě jim drjewo wušło. Po pokiwje wobydlerja zastojnicy woheń zhašachu a pósłachu sydom młodostnych domoj.
To a tamne (19.04.22)
Něhdźe 80 000 listow su dźěći jutrownemu zajacej w delnjosakskej wjesce Ostereistedt napisali. Přeća dopisowarjow běchu jara wšelake. Tak přejachu sej dźěći měr na Ukrainje, kónc koronapandemije, ale tež słódkosće a hrajki. Wulka ličba čestnohamtskich pomocnikow nětko młodym dopisowarjam wotmołwi.
Zhubjeneho pytona su zastojnicy w japanskim měsće Kurashiki w awće wobsedźerja nětko skónčnje namakali. Poprawom chcyše wón hada ze swojeho awta wzać, hdźež pak jeho njenańdźe. Dźesać wosobow sylny team policije bě dny dołho za zwěrjećom pytał. Po wšěm zdaću bě pyton cyły čas w awće, dokelž su jeho we fašku za kablemi namakali.
To a tamne (14.04.22)
W jutrownym času je 130 ze syna zdźěłanych zajacow w Silberbachu, wokrjes Hof, nastajenych. Wone su w kostimach, tak jako policisća abo wohnjowi wobornicy. Předstajene su wšelake sceny wjesneho žiwjenja, tak cyle aktualnje testowa stacija korony dla abo wuchowanska akcija wohnjoweje wobory. Jutry ma gmejnje Konradsreuth přisłušaca wjes z połsta dušemi wjace synowych zajacow hač wjesnjanow, a tójšto wopytowarjow.
Wulku konopjowu plantažu ze 415 000 rostlinami je španiska policija na sewjeru kraja našła. Dohromady pjeć wosobow bu při akciji w Navarrje zajatych, kaž zastojnicy wutoru zdźělichu. Sušene bychu rostliny hódnotu 30 milionow eurow na čornych wikach měli, dale předźěłane na cannabidiol (CBD) a dalše wudźěłki samo 100 milionow eurow. Ekstrakt CBD w medicinje wužiwaja.
To a tamne (13.04.22)
Do wukładneho wokna pjekarnje zrazył je 78lětny ze swojim awtom w Plauenje. Do toho bě so rentnar při zaparkowanju stróžił, jako něchtó zatrubi. Wón stupi mylnje na płunowy pedal město na borzdźidło. Jězba skónči so w pjekarni. Nichtó so njezrani. Awto dyrbjachu wotwlec. Policija trochuje škodu na 20 000 eurow.
Zapozdźenje jeničkeje mjeńšiny zaběra dźěłowe sudnistwo w zapadojapanskim měsće Okayama. Lokomotiwnik bě skoržił, dokelž bě jemu dźěłodawar Japan Railway Company za to 43 yenow wot mzdy wotćahnył, 32 centow. Muž měješe nadawk, prózdny ćah do depota dowjezć. Dokelž mylnje při wopačnych kolijach na ćah čakaše, dojědźe do depota mjeńšinu přepozdźe. Za tutu mjeńšinu wobliči jemu firma 43 yenow. Lokomotiwnik žada sej pjenjezy a 16 300 eurow zarunanja za „psychiske čwěle“.
To a tamne (12.04.22)
Hnydom cyły móst pokradnyła je cwólba paduchow w Indiskej. Něhdźe 18 metrow dołhu železnisku konstrukciju su w běhu třoch dnjow rozebrali a dźěle wotwjezli. Policija je wosom podhladnych zajała a w tym zwisku bager, 247 kilogramow železa a dalši material sćazała. Dźěle mosta běchu wikowarjam šrota předali.
Makabernu zběrku wulkich wutykanych zwěrjatow je španiska policija njedaloko Valencije namakała. Po wotpowědnym pokiwje podachu so zastojnicy k ležownosći w małym měsće Bétera z halemi a wulkej wilu: Tam wuhladachu 1 090 wutykanych elefantow, nosorohačow, běłych mjedwjedźow, lawow, leopardow a tigrow – nastajenych před kulisu afriskeje sawany. Je to najwjetša priwatna zběrka, kotruž su hdy w Španiskej namakali, policija zdźěla. Policija trochuje hódnotu na 30 milionow eurow.
To a tamne (11.04.22)
Britojo, kotřiž rady pinguiny liča a kiž chcyli někotre měsacy w Antarktice žiwi być, móža so za cyle wosebite dźěło přizjewić. Organizacija Antarctic Heritage Trust pyta zajimcow za dźěło w přistawje Port Lockroy. Něhdyše wojerske zepěranišćo na kupje Goudier Island je wot lěta 2006 muzej a sobu najizolowaniša póstowa filiala swěta. Nadawk mustwa je, twarjenja hladać, pinguiny ličić a jich zawostajenstwa zrumować.
Kačka je sej nócnu kupjel z ćopłej wodu w jednej z Mnichowskich halowych kupjelow lubić dała. Sobudźěłaćerjo objekta zwěrjo pjatk rano w jednym z basenkow wuhladachu, wohnjowa wobora zdźěla. Wšitke pospyty, kačku z wody wuhnać, pak zwrěšćichu. Skónčnje móžachu přiwołani wohnjowi wobornicy zwěrjo popadnyć a do swobody pušćić. Kak bě kačka do kupjele přišła, njewědźa.
To a tamne (08.04.22)
900 eurow před pjenježnym awtomatom namakała je 23lětna žona w sewjerosakskim Delitzsch a je pjenjezy pola policije wotedała. Kaž zastojnicy zdźěla, nětko za wobsedźerjom pjenjez pytaja. Policija potrjechenu wosobu prosy, so z dopokazom wo wotzběhnjenju na policajskim rewěrje přizjewić.
We wuliwje duše z porstom tčacy wostała je žona w šwicarskim Winterthurje pola Züricha, jako kupjel rjedźeše. Wohnjowi wobornicy dyrbjachu ju wuswobodźić, štož spočatnje ani tak lochko njebě. Hnydom tři jězdźidła wohnjoweje wobory běchu na akciji wobdźělene. Susod bě wołanje žony słyšał a policiju alarmował. Ani policistam ani wuchowanskim sanitetarjam so njeporadźi, problem rozrisać. Skónčnje dyrbjachu wobornikow přiwołać. Tući z pomocu piły wuliw rozrězachu a žonu njezranjenu wuswobodźichu.
To a tamne (07.04.22)
Wjeselo nad woprawdźitym hrabnjenčkom mjez studowacymi w Nürnbergu njetraješe dołho: Zmylka dla běchu awtomaty tamnišeho bliskowobchada semestersku jězdźenku za 2,07 město 207 eurow předawali. Powěsć wo „rabaće“ bě so póndźelu spěšnje rozšěriła a nawal na awtomaty zbudźiła. Zamołwići su zmylk mjeztym skorigowali. Kelko studentow je sej tuni tiket kupiło, njewědźa.
Putin dóstanje nowe mjeno – znajmjeńša w parku dźiwiny w hornjej Frankskej. Tam bydli dźiwje swinjo z mjenom ruskeho prezidenta. Te pak chcedźa jemu wójny w Ukrainje dla sćazać, zamołwići parka dźiwiny w Mehlmeisel w Bayreuthskim wokrjesu zdźěla. Zwěrjo bě hižo jako proso do parka přišło a swojeho ruskeho nana dla tute mjeno dóstało. „Putin“ waži mjeztym 200 kilogramow a čuje so mjez 21 swinjemi jara derje, kaž zdźěleja.
