Po kraju po puću
Kartowa skica našeho pěšipućowanja po horach. Tura započina so na wyšinje mjez Trjechowom a Nowej Wsu (Naundorf), wjedźe po hrjebjenjowym puću nimo sydlišća Gickelshäuser a kónči so na Pichowje.To je šwarny puć, zwjetša po horach. Ale móžemy turu tež skrótšić. Dwě warianće na wuběr chcu tu wopisać.
Wuchadźišćo maja być we woběmaj padomaj Póckowy (Putzkau), wjes z mało znatej historiskej wosebitosću. Jědźemy z Budyšina najprjedy po B 6 w zapadnym směrje z města won, a hižo w Sćijecach-Ratarjecach wotbočimy nalěwo. Dróha wjedźe do Wjazońcy (Neukirch). Bórze so před nami pozběhuje Pichow. W Nowych Demjanach (Neudiehmen) prěkujemy wyšinu pod Pichowom a hnydom po tym dosćehnjemy Wjazońcu, a dalokodróhu B 98. Wotbočimy naprawo na nju, pasěrujemy dołhu bywšu kolonistisku wjes a dojědźemy do Póckowow, hdźež zastanjemy při cyrkwi.
