Zaćišće wo lětnjej jězbje po Balkanje dwaceći lět po wójnje (4. dźěl)

Wosebitosć Sarajewa je, kaž hižo prajene, bliskosć přirody. Po dźesać mjeńšinach na někajkim chětro postupowacym pućiku ze stareho města sy kromu lěsa a horin docpěł. Na skłoninje hory Trebević sekluje so stara bobowa čara Olympiskich zymskich hrow 1984 přez zdźěla hišće zaminowany lěs. Dźensa słuži wona hłownje Sarajewskim sprayeram jako hoberske płatno. Loni sporjedźachu sankowarjo samo wulke dźěry na čarje, nastate za čas wójny, jako betonowu čaru jako wobtwjerdźene zakitowanske stejnišćo wužiwachu. Zymske hry štyri lěta po smjerći maršala Tita, po kotrymž je w Sarajewje jako jeničkej stolicy regiona hač do dźensnišeho pomjenowana dróha, wotmě so posledni wulki swjedźeń jednotneho juhosłowjanskeho stata.