Pisajo wobchowuje sej awtorka poćah k serbskej Łužicy
Tež, hdyž w Lipsku bydli, ju poprawom po wšej Łužicy nachadźeš. Lubina Hajduk-Veljkovićowa je spisowaćelka a tak ze swojimi twórbami w domiznje prezentna. A tež, hdyž snano runjewon k lubowarjam literatury njesłušeš, sy spěw „Črjopki“ – přednjeseny wot Weroniki Rachelic – abo tež „Kwasny dźeń“ – interpretowany wot Michała Cyža – zawěsće hižo w Serbskim rozhłosu słyšał, zo bych jenož dwaj aktualnej mjenowała. Dohromady 180 spěwnych tekstow spisała je rodźena Budyšanka, kotraž budźe w oktobrje štyrceći lět. Tule w Ludowym nakładnistwje Domowina přihotuja runje druhi krimi za dorosćenych wot njeje, a w Němsko-Serbskim ludowym dźiwadle bě wona w runje minjenej hrajnej dobje z přełožkom elewoweho krucha „Makojčka“ zastupjena. Loni su tam składnostnje połstalětneho wobstaća Serbskeho dźěćaceho dźiwadła jeje kruch „W putach Čorneho pana“ předstajili. Prěni fantasy-roman w serbskej rěči to. Tež prěnja konjaca kniha za holcy „Za wšě pady přećelki“ pochadźa z jeje pjera.
