31. oktobra je tomu 500 lět, zo bě Luther w měsće nad Łobjom swoje 95 tezow wozjewił
Přichodnu wutoru je tomu 500 lět, zo je awgustinski mnich a profesor teologije Martin Luther we Wittenbergu swoje 95 tezow přećiwo wotpuskej wozjewił. To bě spočatk reformacije, a tohodla swjećimy 31. oktober lětsa prěni króć jako cyłoněmski swjaty dźeń. Rezidencne a uniwersitne město Wittenberg sta so tak z kolebku a srjedźišćom reformacije. 1938 dósta wone oficialne mjeno Lutherowe město Wittenberg. Najwažniše twarjenja w zwisku z reformaciju – hrodowu a měšćansku cyrkej swj. Marje kaž tež domaj Luthera a Melanchthona – přiwzachu 1996 do swětoweho namrěwstwa UNESCO.
Wopismo z lěta 965 naspomnja mjeno serbskeje župy Nizici, wupřestrěwaceje so podłu Łobja wot zaliwa Čorneho Halštrowa do njeho hač k zaliwej Modły (Mulde). W lěće 973 jewi so prěni króć mjeno serbskeho sydlišća Broth, nětčiši měšćanski dźěl Wittenberga Pratau a lěta 1004 Grodisti, dźensa Seegrehna na teritoriju Lutheroweho města.
