Lětsa woswjeća w małej, ale znatej delanskej wsy njedaloko hranicy k Horjanam, žadny jubilej. Sernjany zhladuja na prěnje pisomne naspomnjenje wsy před 600 lětami. W susodnej wsy Hrańcy – hranicy k Horjanam – rodźeny Pawoł Rota a dobry znajer stawiznow delanskich wsow je zajimawe stawizny wo Sernjanach zestajał, kotrež čitarjam Serbskich Nowin we wjacorych dźělach dźensa a w přichodnych wudaćach Předźenaka spřistupnjamy:
Lěta hižo noša so někotři Sernjenjo z mysličku, wopominać prěnje pisomne naspomnjenje swojeje wsy. Złožuja so na powěsć Alfonsa Frencla w jeho knižce „Podłu Klóšterskeje wody“. W njej wón piše: „W urbariju (ležownostny a dawkowy zapis w srjedźowěku) krajneho bohotstwa Hornjeje Łužicy je w lěće 1419 prěni raz zapisane wjesne mjeno Czscherna.“