Hižo wot lěta 2005 zetkawaja so w Smjerdźečanskim kulturnym domje dźeń do róžoweje póndźele dźěći k póstniskej zabawje. Lětuša minjenu njedźelu bě mały jubilej, wšako su tam dźěći-nory pjatnaty raz zhromadnje ze staršimi, z wowka­mi a dźědami póstnicy swjećili. Ideju zrodźili běchu žony Smjerdźečanskeho póstniskeho kluba. Simona Šěnowa, hłowna zamołwita, bě wjesoła, zo je něhdźe 80 dźěći ze swojimi staršimi přeprošenje sćěhowało. Tak bě kulturny dom tak połny kaž lědma hdy, a runje tak lóštna bě nalada. Małe nory běchu w najrjeńšich kostimach a  nje­běchu jeno ze Smjerdźaceje, ale tež z wokolnych wsow. Zabawu přisporjała je rjana hudźba, wo kotruž staraše so Achim Cyž. Dźěći njedachu so dołho do rejki prosyć.

Štyrilětna Alba a jeje dwě lěće młódša sotra Lia Nawkec běštej z maćerju a nanom z Jawory přijěłoj. Mjeztym zo nan z nimaj serbsce rěčeše, běchu druzy zadźiwani a połni připóznaća, zo stej so wonej z maćerju, kotraž je z Mexika, runje tak derje španisce dorozumiłoj.