Serbske jutrowne wiki w Budyšinje z wopytowanskim plusom – Najrjeńše kolekcije jejkow wuznamjenjene

Spěchowanski kruh za serbsku ludowu kulturu je minjeny kónc tydźenja mjeztym 28. serbske jutrowne wiki wuhotował. Cyłkownje 2 500 a tak něhdźe 700 wopytowarjow wjace hač loni je dohromady 35 ludowym wuměłcam na prěnim a druhim poschodźe Budyskeho Serbskeho domu přez ramjo hladało a so wobhoniło, kak najwšelakoriše jutrowne jejka nastawaja. Mnozy hosćo wužiwachu móžnosć, sej debjene owalne drohoćinki kaž tež dalše regionalne wosebitostki, na přikład keramiku, rězbiny abo wušiwanki, kupić.

Na třećej etaži mějachu předewšěm młódši hosćo składnosć, so sami we wóskowanju a bosěrowanju wuspytać. Wjace hač 600 kokošacych jejkow su w běhu dweju dnjow pisanili.

Jutrowne wiki su tradicionalny forum, na kotrymž spěchowanski kruh dobyćerjow wubědźowanja wo najrjeńše serbske jutrowne jejko wuznamjenja. Lětsa je wěcywustojna jury dohromady pjeć kolekcijam 1. myto spožčiła. Kaž loni wosta tuž jedna načolna pozicija njewobsadźena, a to we wobłuku wužrawanja.