Młodźinske towarstwo so za Serbstwo hori a spěwny wječork wuhotuje
Serbska murja rěka towarstwo, w kotrymž skutkuje jědnaće čłonow, a woni so jara za serbstwo horja. 28. julija 2016 cyłk załožichu. Zo maja samsne předstawy, to je šěsć młodostnych na swětowym zetkanju młodźiny w Krakowje zwěsćiło, so tak wokoło Pětra Dźisławka zhromadźiło a so jako Serbska murja zjednoćiło.
Do swojeho běrowa Serbskich Nowin w Budyšinje běch sej třoch z nich na rozmołwu přeprosył: 19lětneho Michała Donata z Chrósćic – studenta matematiki w Lipsku –, Mateja Marka z Noweho Łusča, tohorunja Lipšćanskeho studenta matematiki w samsnej starobje. Třeći bě 18lětny Pětr Dźisławk z Chasowa, kiž je „před krótkim wojak był“ a do toho abituru na Serbskim gymnaziju złožił.
