Tójšto swójbow poda so hižo kónc tydźenja na dowol. Dokelž je dźensniši dźeń poměrnje lochko sej do kóždehožkuli kućika zemje dolećeć, budu zawěsće tež Serbja zaso na wšěch kontinentach po puću. Hižo loni běštaj Caroline Hanskec a Stani Šewc z Róžanta daloko preč, mjenujcy na małej kupowej skupince wosrjedź Atlantiskeho oceana – na Acorach. Wone słušeja k awtonomnemu regionej Portugalskeje a su znate za překrasnu krajinu, małe rybarske wsy, zelene łuki a módre hortensije, wulkany, delfiny a wjelryby. Na najwjetšej z mnohich kupow, São Miguel, pobyštaj młodaj Róžeńčanaj. W młodźinskim wudaću wonaj tule na swój přebytk na kupje dopominataj.

„Na wuchodźe kupy nadeńdźechmoj wjesku Furnas. Sylny­ wětr wotdźeržuja tu wulke kraterowe murje, tak zo knježi na kupje włóžna a płódna mikroklima. Nimo toho móžeš tu tak mjenowane fumarole (ze zemje stupaca para) kaž tež horce žórła wobdźiwać. Tam sej domoródni poliwku „cozido“­ warja, za kotruž hač do wosom hodźin trjebaja.