Elias Bětka z Drježdźan bě sej w aprylu ze swojim kumplom spektakularny són spjelnił. Wotpowědnje wuhotowanaj podaštaj so ekstremnaj sportowcaj na kolesu z Drježdźan
do Alpow. Jeju cil: we wšěch sydom krajach Alpow na najwyšu horu pućować.
W septemberskim wudaću smy hižo zhonili, zo docpěštaj w Słowjenskej
(Triglav) předwjeršk a w Awstriskej (Großglockner) wjeršk. W dźensnišim
artiklu rozprawja nam Elias Bětka wo wjerškach w Němskej (Zugspitze),
Liechtensteinje (Vordere Grauspitze) a Šwicarskej (Dufourspitze).
Z Awstriskeje do Němskeje jěć bě trochu komplikowane, dokelž dyrbjachmoj wjele sněha dla chětro dołhi wokołopuć na so wzać. Dypkownje jutrowny kónc tydźenja dojědźechmoj do Ehrwalda, kotryž je wuchadźišćo za najwyšu horu Němskeje Zugspitze (2 962m). Jutry póndźelu rano w 1 hodź. dowjezechmoj swojej kolesy na staciju w dole Ehrwald.
