Felix Grimmig je we wobłuku lětušeho wubědźowa­nja wo najrjeńše jutrowne jejko myto dobył. Nowosličan je so w technice škrabanja wuspytał a swój wudźěłk zapodał. Nad připóznaćom jako najmłódši dobyćer w škrabanju so dźesaćlětny jara wjeseli.

Štó je će pohnuł so ­­na ­wu­bědźo­wanju wo najrjeńše jutrowne jejko wobdźělić?

Felix: Sym hižo wjacore razy pódla był, a chcych to lětsa zaso. Njewědźach wšak, hač to tak prawje póńdźe, dokelž běch sej zhibadło lěweje ruki złamał.

Kelko lět so hižo debjenju jej­kow – specielnje wóskowanju abo bosěrowanju – wěnuješ?

Felix: Ze sydom lětami započach wóskować. Do toho sym jejka jeno z fazerakami pomolował.

Kak tomu, zo jejka nětko tež škrabaš?

Felix: Škrabanje sym jónu w telewizoru widźał. A dokelž je so mi to lubiło, chcych to tež raz wuspytać.

Za debjenje jejkow trjebaš wušiknosć a přede­wšěm wutrajnosć – zwotkel woboje bjerješ?

Felix: Za kóždu techniku mam probowe jejka. Ruka dyrbi so na to zwučić. To je kaž kopańcu abo na in­strumenće hrać. Někak to počasu pytnu, hač mam měrnu ruku.