Schrift vergrößern
Maćij Čórlich steji w swojej hródźi, kotruž je po přewzaću zawoda natwarić dał. Tam je městno za stadło howjadow a picu, kotrež na swojich polach plahuje. Z tym ma w swojim zawodźe wot picy, přez skoćata hač ke kónčnym mjasowym wudźěłkam, optimalny kołoběh. SN/Božena Šimanec
Maćij Čórlich so za ratarjenje hori a tola je so prěnjotnje za druhi powołanski směr rozsudźił. Po swojim puću kročić a so wupytować je jemu wažne. Nihdy přepozdźe njeje so na něšto nowe zwažić. Po tym zo je w lěće 2000 tola ratarski zawod staršeju přewzał, póńdźe nětko samo hišće kročel dale. Wot 1. meje smě wón swoje wudźěłki jako ekologiske plahowane předawać.
Swinjaceje mrětwy dla dyrbja skoćata nětko najprjedy raz w chlěwje wostać. Tam pak su derje zastarane a dóstanu móžnosć w synje borkać abo tež w nim spać. Swinje z dołhimi čerwjenymi kosmami přisłušeja družinje Duroc, kotrež Maćij Čórlich nimo dweju dalšeju na dworje plahuje.
Sobudźěłaćer Frank Vcelich njedźěła jenož z ratarskej techniku. Jako wukubłany rěznik wón skoćata hnydom na dworje zarěza.
