Deleńkec statok srjedź wsy w Chrósćicach njeje jenož ródny dom dźěda předsydy Domowiny Dawida Statnika, ale tež rjany přikład za „kontinuitu tradicije“, kaž na přijeću składnostnje zahajenja festiwalneho wječora sobotu rěkaše. Sakske Nowiny su tróšku šćipaće pisali, zo běše to zawrjene zarjadowanje zwonka zjawnosće. Přiwšěm běše lisćina hosći z tu- a wukraja dołha dosć a městno za masy ludźi runja druhim burskim statokam tule njeje. Poprawom je rjenje hladany dwór tajke něšto kaž prózdninski kwartěr.

Jadwiga Deleńkec bydli hižo třiceći lět w Berlinje, a dom słuži prawidłownym kónctydźenskim pobytam we Łužicy. Zhromadnje ze swojim bratrom Měrćinom, wón je mjeztym wosom lět farar w Chrósćicach, je wona statok kupiła, jako třeći je so jeje muž přidružił. Tak su substancu dwora zdźerželi – a herbstwo třoch legendarnych nježenjenych ćetow wuchowali, kotrež běchu jónu wobličo tutoho statoka.