Najwyši wjeršk Łužiskich horow skići wotměnjawe stawizny a přeprošuje na pućowanje
Zbytki stareje powjaznicy dopominaja na časy, jako sněhakowarjo po horje smalachu. Wot lěta 2012 je areal zawrjeny.Kak rěka najwyši wjeršk Łužiskich horow? Čornobóh, Mnišońc abo Lubijska hora? Lědma štó by drje hnydom na Sokolnik nad Wjazońcu myslił. Ze swojimi – w lěće 2016 znowa wuměrjenymi – 588 metrami je wjeršk Sokolnika woprawdźe najwyši dypk tutych horow.
Mjeno pochadźa, kaž móže sej kóždy myslić, wot ptačka Sokoła. Hač do 19. lětstotka tež Němcy pomjenowanje Falckenberg abo Falkenberg wužiwachu. Pozdźišo nasta z njeho dźensniši Valtenberg.
Markantny dypk Sokolnika je wuhladna wěža. 22 metrow wysoki kamjentny twar su 1. julija 1857 poswjećili. Jón běchu za swój čas po naćisku Žitawskeho architekta Carla Augusta Schramma za lědma 150 dnjow natwarili. Wěžu pomjenowachu po sakskim kralu Johannje. Prěni, z drjewa twarjeny hosćenc pod wěžu so 1859 wotpali. Na jeho městnje natwarichu masiwny kamjentny dom.
