Štóž husycu jě, móže sej jutež zaso wotběhać
Pod tymle hesłom startowachu w Němskich Pazlicach tež někotři wopytowarjo diskoteki Herbert 25./26. decembra. Hač do ranja w sedmich woni tam swjećachu a stejachu hižo w dźesaćich zaso při sportowym centrumje, zo bychu so druhi hodowny swjaty dźeń na pjećkilometrowsku čaru wokoło Němskopazličanskeho wulkeho hata podali.
Byrnjež njebjo chětro šěre było, je 260 wólnočasnych sportowčow a sportowcow 26. hodownika do Němskich Pazlic přišło. Mjez nimi bě samo sportowc na jednokolesu (Einrad) z Großröhrsdorfa. W cilu přijachu wšitcy wopismo za 16. wotběhanje hodowneje husycy a napoj hosćićela.
Sportowe towarstwo Natwar Němske Pazlicy so sponsoram ludosportoweho zarjadowanja wutrobnje dźakuje a přeje wšěm wšo najlěpše w nowym lěće.
Jutry póndźelu su potom wšitcy na 12. wotběhanje jutrownych jejkow přeprošeni. Norbert Adler
Přihoty Budissy na druhu połseriju
Koparjo regionalneho ligista Budissy Budyšin maja w januarje wobšěrny přihotowanski program za druhu połseriju zmištrować. Hra 27. wulkeho róžka přećiwo FC Hornjej Łužicy Neugersdorf so jenož přewjedźe, wostanje-li kónc tydźenja bjez nachwatanskeje dypkoweje hry.
03.01. prěnja treningowa jednotka 2018 Budyšin
10.01. – 14.01. treningowe lěhwo Sokolov (CZ)
13.01. FSV Budissa Budyšin – VFC Plauen Sokolov
17.01. 19:00 FSV Budissa Budyšin – Radebeulski BC Budyšin
20.01. 11:00 FSV Budissa Budyšin – Jednota Kamjenc Budyšin
27.01. 11:00 FSV Budissa Budyšin – FC HŁ Neugersdorf Budyšin Kilian Hrjehor
Sport (29.12.17)
Na silwesterski běh
Sportowe towarstwo Čerwjeno-běli Budyšin 90 přewjedźe njedźelu, 31. hodownika, na Budyskej Młynkec łuce 51. silwesterski běh. Start za hłownej distancy 10,6 a 5,3 km je za 9.30 hodź. planowany, tón za krótšu čaru 2,5 km budźe dźesać mjeńšin pozdźišo.
Ludosportowy turněr blidotenisa
5. januara we 18 hodź. zetkaja so wólnočasni blidotenisća z Kulowa a wokolnych wsow na 1. ludosportowy blidotenisowy turněr po Nowym lěće, a to w małej Kulowskej sportowej hali. Organizatoraj stej TV Hózk/Kulow 1974 a wotrjad blidotenis Módro-běłych Kulow.
Zymski wrotowy festiwal
Kulowminatije a United Clubs for Kulow přeprošeja wšitkich koparjow z města a wsow na zymsku ediciju najwjetšeho wrotoweho festiwala kołowokoło Kulowa. 6. januara změja tam pjaty nakład zymskeho Kulow-cupa. Zakop we wjacezaměrowej hali je w 12 hodź. Přizjewjene su tele mustwa: Dołha garda, Zelena garda, Company of Kulow, Team Toplife, Gut Kickerz, Wjesni hłupacy, Söffner a Kulowminatije.
Halowy turněr TCM
Faworitso přesadźił
Módro-běli Wojerecy – ST Coswig-Mišno 3:1 (18:25, 25:13, 25:20, 25:13)
ST 1896 Wulka Dubrawa – ST Coswig-Mišno 1:3 (20:25, 25:23, 23:25, 15:25)
ST 1896 Wulka Dubrawa – Módro-běli Wojerecy 1:3 (16:25, 21:25, 26:24, 13:25)
Volleyballisća Sportoweho towarstwa 1896 Wulka Dubrawa móžachu najebać dwě poražce w krajnym pokalnym kole z pozběhnjenej hłowu domjacu halu wopušćić. Před 50 zahorjenymi fanami, potajkim wjac hač na někotrych koparskich we wokrjesnej wyšej lize, móžachu hosćićeljo přećiwo wyšoklasowymaj zastupjerjomaj stajnje jednu sadźbu dobyć.
W prěnjej hrě dnja přewiny faworit Módro-běli Wojerecy (sakska liga) Sportowe towarstwo Coswig-Mišno (sakska klasa) z 3:1 po sadźbach. Překwapjace wšak bě, zo Wojerowčenjo prěnju sadźbu z 20:25 přěhrachu. Tři dalše přechody pak z wobhladanjahódnymi nadběhami dobychu. Wulkodubrawčenjo so hosćom z Mišna chětro wobarachu, tak zo traješe hra 85 mjeńšin. W druhej sadźbje poradźi so jim samo wuspěch 25:23.
Wšitke tři hry běchu wabjenje za volleyball, wšako maja tež we Wulkej Dubrawje wulke ćeže z dorostom.
Heinz Noack
Prěni mjezyšulski volleyballowy turněr přewjedźeny
Šulerki a šulerjo 10. lětnika šule „Michał Hórnik“ Worklecy su do hodownych prózdnin w tamnišej sportowni prěni volleyballowy turněr mjez serbskimaj wyšimaj šulomaj z Worklec a Ralbic dobyli. Na dalšimaj městnomaj sćěhowaštej mustwje 9. lětnika z Ralbic a 9. lětnika z Worklec.
Na mjezyšulskim volleyballowym turněrje bě so šěsć volleyballowych cyłkow wobdźěliło. Nimo třoch mjenowanych běchu to hišće Ralbičanski 10. lětnik kaž tež Worklečanske a Ralbičanke holcy 9. a 10. lětnika. Ralbičanscy šulerjo so za přeprošenje z Worklec tule hišće raz wutrobnje dźakuja. Sportowaj wučerjej, knjeni Diana Šołćina a knjez Křesćan Bejmak, běštaj turněr iniciěrowałoj.
Pawk nócny wolejbul wotměł
Hižo wosmy raz je Serbske młodźinske towarstwo Pawk dohodowny nócny wolejbul w Pančičanskej sportowni wotměło. Dwanaće mustwow bě so přizjewiło, zo bychu hač do pózdnjeje nocy wo dobyće wojowali. Nimo wjesnych młodźinskich a sportowych cyłkow su tež lětsa zaso studenća z Lipska a Drježdźan pódla byli. W direktnym duelu móžachu so studenća Sorabije přećiwo skupinje Bjarnat Krawc z 19:17 snadnje přesadźić.
Wupisanje za 36. sokołski volleyballowy turněr
termin turněra: 10. měrca 2018
městnosć: sportowa hala
na Budyskim Třělnišću
čas: 8 do 16 hodź.
zarjadowar: Serbski Sokoł z.t.
wuhotowar: Sokoł Budyšin z.t.,
Škit Budyšin,
Mustwo 1296
zaměr turněra: Pod sokołskim hesłom „Sportej a narodej – zdar!“ chcemy so zetkać k lóštnemu sportowanju a wjesołej zabawje. Zdobom chcemy styki mjez serbskimi volleyballistkami a volleyballistami a dalšimi sportowčemi a sportowcami skrućić a k popularizowanju Serbskeho Sokoła přinošować.
přeprošene mustwa: Na turněr witane su mustwa dotalnych turněrow a nowačcy. Volleyballowe cyłki z wukraja njejsu přeprošene. Kóždy volleyballist, kotryž so do jednoho mustwa zarjaduje, njech so w swójbje sportowčow/sportowcow derje čuje.
Widźał, słyšał, napisał (27.12.17)
W zymje volleyball hrać? Haj, to je w kóždej sportowni móžno. A što je z beachvolleyballom? Ně, je dźě přezyma, a často mjerznje! Mam pak něšto noweho za was: snowvolleyball. Mysliće-li runje na krótke cholowy, pěsk a wysoke temperatury, móžeće to hnydom zabyć. Tu su volleyballisća ćopłu sportowu drastu woblečeni a hraja w sněze. Nimo toho maja koparske črije wobute.
Snowvolleyball je wosebita warianta volleyballa, při kotrejž je hrajnišćo w sněze. Regularije wotpowěduja tym beachvolleyballa. Snowvolleyballowa hra pak wotměwa so na wysokosći něhdźe 2 000 metrow. Snowvolleyball njeje žana wunamakanka z Němskeje. Wuwili běchu tule sportowu družinu w lěće 2009 w awstriskim Wagrainu. Po wjacorych turněrach w Alpach připózna awstriski volleyballowy zwjazk 7. nowembra 2011 snowvolleyball jako oficialnu sportowu družinu. Před lětomaj bě tak daloko, zo je ju Europske volleyballowe zjednoćenstwo (CEV) oficialnje do programa přiwzało. Wotnětka buchu turněry pod hesłom Snow Volleyball European Tour přewjedźene.
Sport (22.12.17)
Hodownu husycu sej wotběhać
Natwar Němske Pazlicy chce druhi hodowny swjaty dźeń znowa sportowy podawk bjez wubědźowanskeho charaktera přewjesć. 17. raz móža sej tam zajimcy hodownu husycu wotběhać. Loni bě so 260 sportowcow wobdźěliło. Pjećkilometerska čara wokoło wulkeho hata je za kóždeho zmištrujomna. Tež psy, dźěćace wozyčki a kolesa smědźa ludźo sobu na puć wzać. Start je w 10 hodź.
SZ-cup a Landskron-cup
27. decembra budźe w sportowej hali na Budyskim Třělnišću tradicionalny halowy koparski turněr wo pokal dźenika Sächsische Zeitung. Jeho mjeztym 22. cup započnje so w 17 hodź. W stafli A hraja Budissa Budyšin U 21, ST Horni kraj Sprjewja, ST Budyšin a Motor Kumwałd; w stafli B FSV Nowosólc-Hródk, ST Hnašecy-Dobruša, ST Wjelećin a Póst Germanija Budyšin. Landskron-cup přewjedu w Budyšinje potom 6. januara wot 14 hodź., tež w sportowni na Třělnišću. Tam hraja w skupinje A Budissa Budyšin, Jednota Kamjenc a Přezjednota Niska; w stafli B FC Hornja Łužica Neugersdorf, Biskopičanske KT a dobyćer SZ-cupa.
Na basketball do „Slavije“
