Widźał,słyšał, napisał (06.11.17)
Awtor dźensa
Tadej Cyž
Z wulkimi kročelemi bliži so čas zymskich sportowych družin a wubědźowanjow. Na zymu 2017/2018 su so atleća kaž tež trenarjo přez cyłe lěćo jara dokładnje a akribisce přihotowali. Treningowe lěhwa, optiměrować techniku a wupruwować nowe treningowe metody su jenož někotre móžnosće, so hišće dokładnišo na jednotliwu disciplinu přihotować a so polěpšić.
Wot 9. do 25. februara 2018 wotměja so w Pyeongchangu Olympiske zymske hry. Po lěće 1988 w Seoulu su to druhe olympiske hry w Južnej Koreji. Po poměrnje špatnym wotrěznjenju w Sočiju 2014 z 8 złotymi, 6 slěbornymi a 5 bronzowymi medaljemi chce němske mustwo zaso na podest, štož pak njebudźe lochko. Wšako su wuměnjenja za profijowych sportowcow w druhich krajach wo wjele lěpše a profesionalniše hač tu.
Prěni dypk darili
SJ Njebjelčicy
– SJ Chrósćicy II 1:1 (0:1)
Zestawa domjacych: Hahn – Čornak, Hanuza, Deleńk, Hrjehor, Tatzel (46. Ričel), Kral, Lejnart, Hoelzel, Haška, Korjeńk
Zestawa hosći: Matješk – Mark, Šiman, Šefer, Budar, Ließner (85. Šmit), Jakubaš (90. Pjetaš), Bogusz, Dehn, (77. Šołta), Zahrodnik, Dórnik
Na přemačanym trawniku pokazachu hrajerjo Njebjelčanskeje SJ zdźěla kontraproduktiwnu kopańcu. Rezerwa Chróšćanskeje SJ bě pak wot prěnjeje mjeńšiny połnje motiwowana. Přez zdźěla njedisciplinowane hraće, wosebje w prawym škiće, poskićichu so tak rumy k nadběham za hosći. Jan Bogusz doběža sej w 11. min. přihrawku a zběhny bul přez domjaceho wrotarja do prózdneje klětki k 0:1.
Hakle w druhim połčasu so Njebjelčenjo trochu stopnjowachu, a hakle w 67. min. so jim poradźi wurunać. Najstaršemu w cyłku Tobiasej Deleńkej bě přewostajene, tele wrota po róžku Floriana Ričela z hłójčku docpěć. Při šansach přez Lejnarta, Hrjehorja, Korjeńka a Hoelzela wšak hač do wothwizdanja k dalšemu wuspěchej za domjacych wjac njedóńdźe.
Wuslědki (06.11.17)
Regionalna koparska liga žonow
Beelitz – Rostock1:1 (0:1)
RB Lipsk – Biskopičanske KT 2:1 (0:1)
BSC Marzahn – Union Berlin 0:2 (0:1)
Viktoria Berlin – Magdeburg 1:2 (0:1)
Aue – Fortuna Drježdźany 1:1 (1:0)
Neubrandenburg – Steglitz 2:2 (2:0)
1. Magdeburgski FFC 8 39 : 4 24
2. FC Viktoria Berlin 9 39 : 5 24
3. FC Union Berlin 8 25 : 7 19
4. RB Lipsk 9 14 : 16 16
5. Steglitzski FC Stern 9 26 : 12 14
6. BSC Marzahn 8 25 : 16 14
7. Fortuna Drježdźany 9 14 : 19 12
8. FC Rudne horiny Aue 9 10 : 25 7
9. Rostockski FC 9 7 : 38 4
10. Biskopičanske KT 8 8 : 21 3
11. FC Neubrandenburg 8 7 : 25 3
12. SZ Módro-běli Beelitz 8 1 : 27 2
Sport (03.11.17)
Derby a dalše hry blidotenisa
W prěnjej wokrjesnej lize přewjedu dźensa na Konječanskej wjesnej žurli blidotenisowy derby mjez tabulkowymaj susodomaj z Konjec a Rakec. Duel započnje so w 19 hodź. Jutře wočakuje prěnja blidotenisowa šestka Viktorije Worklecy wot 16 hodź. TTSV Hagenwerder.
Dalše hry:
6.11. 19:00 Bartske ST II – Radwor
10.11. 19:00 Módro-běli Njeswačidło
– DJK Konjecy
13.11. 19:00 Wóspork/Hrodźišćo IV
– ST Radwor
Kónctydźenska kopańca
Prěnje koparske mustwo ST Radwor dyrbi so zajutřišim, njedźelu, wot 14 hodź. z načolnikom wokrjesneje wyšeje ligi rozestajeć. K njemu přijědźe SC Großröhrsdorf, kotryž je dotal wosom wot dźesać hrow dobył a dwójce njerozsudnje hrał. Z dwojimi přećiwniskimi wrotami ma Großröhrsdorf z wotstawkom najmjenje w lize. Dalše hry:
4.11. 14:00 Módro-běli Kulow
– SG Großnaundorf
4.11. 14:00 Rakečanske ST
– Motor Kumwałd
5.11. 10:30 LSV Hory
– Sokoł Ralbicy/Hórki
5.11. 10:30 Nowe Město II
– SJ Njebjelčicy
5.11. 11:30 SJ Chrósćicy II
– Zeleno-běli Sepicy
5.11. 12:00 Zeleno-běli Sepicy II
– SJ Njebjelčicy II
5.11. 13:00 ST Marijina hwězda
– HZ Wulke Ždźary
5.11. 14:00 SJ Chrósćicy – ST Ćisk
Kehelowanje
11.11. 16:00 Sokoł Ralbicy/Hórki
– SZ Motorizowany
Jürgen Croy w Dźěžach był
Přećiwo faworitej sej tři dypki wubědźili
ST Čerwjeno-běli Mužakow
– SJ Chrósćicy 0:1 (0:0)
Zestawa hosći: Králíček – Pöpel, Sentiwan, Hrdlitschka, F. Zahrodnik (46. Teichmann), Henčel, M. Zahrodnik, Runt, Młynk (69. Žur), Věchet, Němec
Chróšćanscy koparjo nastupichu minjenu sobotu w Mužakowje. Tamniši Čerwjeno-běli běchu wězo faworit, wšako steja na třećim městnje tabulki. Tola hižo wot spočatka přihladowarjo pytnychu, zo budźe to jara wurunana a napjata hra. Po někotrych mjeńšinach běchu hosćo prěni raz w šěsnatce přećiwnika. Pavel Runt chcyše flankować, tola domjacy škitar bul z ruku wotwobara. Fanojo, kotřiž běchu z Chrósćic sobu přijěli, sej wězo jědnatku žadachu, ale sudnik rozsudźi na róžk. Tež přiwisk z Mužakowa Chróšćanskemu přiwiskej přihłosowaše, zo měła to jědnatka być. Najebać rozsud Chróšćenjo dale angažowanje hrajachu. Hosćićeljo pak přez spěšnych hrajerjow zas a zaso nadběhowachu. Wulke móžnosće za nich přiwšěm njewuskočichu. Po nadběhu přez lěwu stronu wšak přińdźechu woni do šěsnatki, ale jich wótry kop na wrota trjechi na zbožo jenož aluminij hóstnych wrotow.
Prěnja domjaca poražka
Budissa Budyšin
– Union Fürstenwalde 1:2 (1:1)
Zestawa domjacych: Ebersbach – Weiß, Patka, Hoßmang, Kunze, Krawčik (66. Milde), Pfanne, Müller (76. Rosendo), Schmidt, Gehrmann (59. Mack), Bönisch
Jako pjate tabulki bě koparske mustwo Union Fürstenwalde z trenarjom Matthiasom Mauckschom na Budysku Młynkec łuku přijěł. Trenar Budissy Torsten Gütschow chcyše domjacu seriju bjez poražki wuspěšnje dale wjesć.
Wysoke dobyće při sylnym wichoru
Sokoł Ralbicy/Hórki
– ST Wjelećin 5:0 (3:0)
Zestawa domjacych: Ch. Gloxyn – Rawš, Šewc, Korjeńk, Matka, Šołta (67. B. Bjeńš), S. Bjeńš, Młynk (51. Janca), Materna (79. Kobalc), Kurjat, Domaška
Rezerwa hwězdźičkow přěhrała
Rakecy za Lippmanna poslednja trenarska stacija
Frank Lippmann, 56lětny něhdyši kopar Dynama Drježdźany, je 1986 do ZRN ćeknył a so po změnje zaso nawróćił. Wot noweje hrajneje doby trenuje wón prěnje koparske mustwo Rakečanskeho ST we wokrjesnej wyšej lize. Heinz Noack je so z nim rozmołwjał.
Čehodla sće z Biskopic do Rakec přišoł?
F. Lippmann: To je cyle spěšnje šło. Smy we woběmaj sportowymaj towarstwomaj před lětami hižo raz w dorosće fuziju měli. Znajemy so potajkim. Do hrajneje doby 2017/2018 njeje Rakečanske ST runjewon dobry start měło, ale nětko so nam wšo lěpje radźi. Nowi hrajerjo dyrbjachu so zažiwić, dalši dźěry płatać, dokelž někotři přestachu abo běchu k druhim towarstwam wotešli.
Z kotrym cilom sće do noweje sezony šli?
