Serbski ludowy ansambl předstaji jutře w 19 hodź. inscenaciju „Wójna | a | ...“ z baletom, chórom a orchestrom na hłownym jewišću w dźiwadle w Radebeulu. Inscenacija wobjednawa prěni dźěl oratorija „Wójna a měr“. Ideju za inscenaciju měješe Tomas Kreibich-Nawka w zwisku z 75. posmjertninami serbskeho komponista Bjarnata Krawca. Hans-Peter Preu je oratorij za instrumenty napisał. W intensiwnych choreografijach Gundule Peuthert jón balet inscenuje. Foto: SLA/Martin Pižga

Jeli pytane słowa 1–11 prawje zapisaće, wučitaće we wuzběhnjenymaj rjadomaj sportowe wukony.

1 psyk, 2 italska stolica, 3 nic mało, 4 jara špatnje, 5 zelenina, 6 japanska stolica, 7 ličba­, 8 paradiz, 9 rozsud sudnistwa, 10 jedyn jendźelsce, 11 haj jendźelsce

W lěće 1980 bu lětny čas w Němskej znowa zawjedźeny, kotryž so poslednju njedźelu w oktobrje z wróćostajenjom časnikow skónči. Elektriske časniki drje tole bjez problemow cyle same zdokonjeja. Mechaniske časniki a budźaki pak maja sej ludźo sami nastajić a w nocy na njedźelu w 3 hodź. na 2 hodź. wróćo stajić. Nóc so tuž wo hodźinu podlěša. Fotomontaža: SN/Bojan Benić

We wudaću nazymnika zhonimy wo sprawnej podpěrje młodostnym – město haćenja – a dajće so wot lochkeje wote­wrjenosće hladajo na Gen Z inspirěrować: Kak husto zamóžnosće a potencial tuteje generacije podhódnoćimy? Nadja Brězanec jasne słowa za to namaka.

Dale namakamy pojednanje wo potomnikach Ryćerjec bratrow, kotřiž su so wot serbskeje identity zdalili. To so w němskim nastajenju jich potomnikow reflektuje. Jedyn z přisłušnikow swójby, Ludwig Alwin, napisa jako wuměnkar swoje žiwjenske dopomnjenki. Wón měnješe, zo běchu jeho prjedownicy Němcy, kotřiž připadnje tež serbsce rěčachu. Wšako běše serbšćina w Hodźiju, bydlišću jeho dźěda, dominowaca rěč. Evelyn Fiebiger předstaji tute stawizniske wuwiće na zakładźe někotrych biogramow Ryćerjec potomnikow, kotrychž spočatnje jako wuběrny přikład za wuspěšne stawizny serbskeje swójby wobhladowaše.