Krabatowe towarstwo chce tež město Budyšin jako čłona zdobyć

Rakecy (UM/SN). W Rakecach nadeńdźe wopytowar wosrjedź torhošća z bantom w serbskich barbach wobwity sćežor – tak mjenowany woponowc (Wappenbaum). „Wón nosy wopony wšěch městow a gmejnow, kotrež Krabatowemu towarstwu přisłušeja“, praji Wulkoždźarowčan Steffen Mühl, wot lětušeho předsyda towarstwa. Mühl naslěduje Reinera Deutschmanna, kotryž běše Krabatowe towarstwo 19 lět dołho wuspěšnje na dobro regionalneho wuwića w dwurěčnej Łužicy nawjedował.

Nowy předsyda dale rozłožuje: „Woponowc, kotryž su domoródni rjemjeslnicy zhotowili, postajimy kóždu nazymu w tej gmejnje, w kotrejž Krabatowy tydźeń zahajimy“. Lětsa, na Dnju Němskeje jednoty 3. oktobra, běše Krabatowy dwór w Jitku, wjesnym dźělu Rakečanskeje gmejny, hosćićel zahajenskeho zarjadowanja. Loni běše towarstwo woponowc w Kamjencu postajiło, dokelž je tam Krabatowy tydźeń wotewrěło.