Na wopyće pola filmoweje a dźiwadłoweje wědomostnicy Cosimy Stracke-Nawka

Do wulkeho wokna bydlenskeje stwy Cosimy Stracke-Nawka nisko stejace słónco swěći. Wukubłana filmowa ­a dźiwadłowa wědomostnica w čumpatym křesle spokojnosć wuprudźa. 66lětna žona čuje so w duchu a ćěle swobodna a zbožowna hladajo na to, štož je w žiwjenju dokonjała. „Běch hač do lońšeho kruće přistajena referentka za program, dokumentaciju a młodźinski škit při Sakskim krajnym wustawje za rozhłós a nowe medije (SLM). Směm nětko na to zhladować, štož wšo sym zdokonjała“, mi rentnarka powěda. Při tym je wona přeco na to hladała, zo so we Łužicy tež profesionalne serbske filmowstwo wuwiwa, kotrež zamóže přeswědčiwje serbske temy ludźom zwonka łužiskeho regiona spřistupnić. „Za to chcu so přichodnje dale čestnohamtsce zasadźeć.“ Angažowana žona pochadźa z němskeje swójby, serbska problematika pak jej na wutrobje leži. Tak čuje so sobu zamołwita za dalše spomóžne wuwiće serbskeje kultury.