Ze Serbskeho rozhłosa znaty Milan Grojlich drje mjenuje so jako hudźbnik rokotak, tola jeho hudźba je wšo druhe hač někajki rokot abo šćebot rokotaka, ptaka ze samsnym mjenom. Ně, jeho debitowy album „Riech an Blumen (und merk dir ihre Namen)“ je zběrka dwanaće měrnych a melodiskich spěwow, a tajka na­lada so w tekstach wotbłyšćuje.

Spěwy wuprudźeja najwšelakoriše formy a nuansy melancholije. W njej chowaja so jěrosć, mučnota a přesłapjenosć runje tak, ale tež lochkosć a wjesołosć. Wid dozady so husto jewi, kiž je zdobom zhladowanje na aktualny čas, kaž w linkach „Kannst du denn auch die alten Lieder nicht mehr hören / Ohne zu denken – ich weiß nicht, ob wir hier noch dazugehören“. Ženje pak z toho žane žałosćace ‚něhdy bě wšo lěpje‘ njewurosće, dokelž so wid wróćo přeco zaso łama, kaž w teksće „Kannst du denn auch die alten Fotos nicht mehr sehen? / Weil du ja weißt, in Wirklichkeit war es nur etwa halb so schön“ abo „Denn auch die guten alten Zeiten sind nur alt / Auch wer den Wald trotz all der Bäume sieht, sieht eben doch nur Wald“.