Wšitcy serbscy wobdźělnicy na prědnich městnach

Při poslednim lětušim běhu, kiž hódnoćeše so hišće za rjadnu lisćinu Drježdźanskeho wobwoda, za lětušej rjadnej lisćinje Delnjołužiski cup a za Pokal wjercha Pücklera, je so w Běłej Wodźe na mjeztym hižo 24. tradicionalnym běhu při Brusniku (Braunsteichlauf) na pjeć distancach 0,8 km, 2 km, 4,5 km, 9 km a 13,5 km dohromady 317 wobdźělnikow wubědźowało. Najmłódši starter bě štyri lěta, najstarši 97 lět. Młodostni a dorosćeni startowachu w swojim wotpowědnym běhu na idyliskej 4,5 kilometrow dołhej kołočarje tohole jězora, mjez kotrymiž bě tež lětsa zaso horstka Serbow.

Na 13,5 km rěkaštaj cyłkownaj dobyćerjej Daniel Seibt (Drježdźany/51:41 min) a Franziska Kranich (Niska/58:30 min). Cyłkowne 2. městno a dobyće w swojej starobnej skupinje (sk) 45-49 wubědźi sej Silvio Schade z Budyšina (54:14 min). W sk 50-54 lět zmištrowa Handrij Bejmak ze Starych Ratarjec tři koła w spěšnych 1:00:16 h, štož rěkaše 3. městno na podesće.