ST Rakecy II
– ST Marijina hwězda 0:2 (0:1)
Zestawa hosći: O. Schmidt – Wróbl (81. Hübner), Škoda, Jurš, Lipič, Rab, (38. P. Schmidt), Kuring, O. Hawš, R. Hawš, Eldor (78. Winkler), Pakoßnick
Bě to nachwatanska dypkowa hra, kotraž je so poprawom 18. měrca přewjesć dyrbjała. Tón dźeń pak zadźěwaštej sněh a lód duelej. Z koncentrowanym a solidnym přestajenjom móžachu pak hosćo z Pančic-Kukowa partiju pola druheho mustwa Rakečanskeho ST 2:0 dobyć. Jakob Pakoßnick a Oskar Hawš třělištaj wrota za druheho wokrjesneje ligi stafle 2. Najlěpši hrajer dnja Oskar Hawš spřihotowa w 17. min. nawjedowanje. Z wuběrnym pasom posłuži wón Pakoßnicka, kotryž nisko k 0:1 trjechi. Z diagonalnymi bulemi spytachu domjacy do strašneje cony přińć, štož so jim w 20. min. tež poradźi. Nadběhowar běše nadobo sam před wrotarjom Oliverom Schmidtom, kotryž z wulkotnej paradu wrotam zadźěwa. Nětko so wobaj cyłkaj w srjedźnym polu neutralizowaštej. Krótko do połčasa pak měješe Richard Hawš 0:2 na noze, bul pak lećeše do mróčelow.
