Měšane mustwo šulerjow a wučerjow Serbskeho gymnazija Budyšin (SGB) je spočatk februara w Kulowje 8. ptačokwasny wolejbulowy turněr dobyło. Wot cyłkownje sydom wólnočasnych mustwow wubědźi sej SJ Chrósćicy druhe a ST 1922 Radwor třeće městno.
Prěnja stacija wólnočasnych wolejbulowych turněrow serije „top-sydom“ lěta 2025 bě 3. februara w Kulowje w tamnišej sportowni. Předsyda sportoweje jednotki Žołto-módri Kulow Roland Stiebitz wjeseleše so při zahajenju, zo je wšitkich sydom cyłkow na mjeztym 8. ptačokwasny turněr dojěło.
