Dorothea Michalk je lětsa prěni króć šat za debitantki bala w Semperowej operje naćisnyła, wuwiła a produkowała. Milenka Rječcyna je so ze z Łužicy pochadźacej designerku rozmołwjała.

Bě lětuši operowy bal na Was z wosebitymi wužadanjemi zwjazany?

D. Michalk: Bjezdwěla, haj. Wšako sym šat debitantow prěni króć zhotowiła. Stoty jubilej bě jedne z ćežišćow mojich rozmyslowanjow wo designje. Dalše běchu tak mjenowane złote 20te lěta zašłeho lětstotka. Tuž bě płat z wiskozy w barbje šampanskeho a židźana sekla bě złotobarbna. Tak je so šat swjatočnje zybolił.

Sće při wuwiću designa aktualne modowe trendy wobkedźbowała?

D. Michalk: Ně, scyła nic. W modźe za wječornu a swjatočnu garderobu je wažne měć šat wysokeje kwality a design, kotryž žonu wuzběhuje. Šat debitantkow měješe młody, čerstwy, moderny a swjatočny raz. Ze zlětowacymi so paskami při sekli sym elementy narodneje drasty zapletła. Z mojim rukopisom wuprudźa šat elegancu, kotraž je mjez druhim wowliwowana wot sylneho fałdowanja po přikładźe romsko-grjekskeje mody.