Kamjenc (BG/SN). Kamjenske powołanske wiki wotměchu so minjenu sobotu zaso „kołowokoło towera“ Kamjenskeho lětanišća. Hižo někotre lěta zarja­dowanje Budyski wokrjes, Kamjenska wotnožka Drježdźanskeje industrijneje a wikowanskeje komory a Budyske ­wo­krjesne rjemjeslnistwo organizuja. Wjace hač 80 předewzaćow ze Sakskeje a ­z Braniborskeje je swoje powołanske móžnosće zajimcam spřistupniło. Mnozy z nich su na swojich internetnych stronach za powołanske wiki pod hołym njebjom wabili. A tak je tež tójšto ludźi składnosć wužiło. Młodźi zajimcy přichadźachu lětsa sami abo ze staršimi na teren lětanišća. „Sym hišće šuler a chcu so dźensa woměrje rozhladować. Mojej staršej sym tuž doma wostajił“, Paul Hofmann z Kamjenca rozłoži. „Z mojim nanom sym sej poskitki předewzaća BASF dokładnišo wobhladał a z wukubłarjemi rěčał“, Karl Feistel wujasni. Někotři šulerjo su samo z dźědom a wowku přišli.