Łužiski kruh sej naprawy k zawěsćenju wobběha wody w regionje pomina

Baršć (AK/SN). Łužica trjeba dołhodobnu strategiju, zo by jeje wobběh wody zaručeny a stabilizowany był. To su zastupjerjo krajej přesahowaceho wulkeho Łužiskeho kruha wčera w Baršću podšmórnyli. W poziciskim stejišću žadachu sej hodźace so naprawy předewšěm za system Sprjewje. Wob lěto je tam składowanske mnóstwo něhdźe 180 milionow kubiknych metrow wody trěbne. „Zaměr stejišća je, zo Łužiski kruh porno politisce zamołwitym w Zwjazku a krajomaj swoju poziciju zwuraznja“, wuwědomi dr. Klaus-Peter Schulze, nawoda dźěłoweje skupiny woda. Wona je stejišćo zdźěłała a so při tym na aktualnej studiji zwjazkoweho wobswětoweho zarjada „Wodohospodarske sćěhi kónca wudobywanja brunicy we Łužicy“ orientowała. Adresaća tohole stejišća Łužiskeho kruha su zwjazkowy kancler, zwjazkowa ministerka za wobswět, Swobodny stat Sakska, Kraj Braniborska a Berlinski senat.