Železniski koncern Alstom, dźěłarnistwo IG metal a cyłkowna zawodna rada předewzaća su po dojednanju wo přichodźe stejnišćow w Zhorjelcu a Budyšinje kónc měrca nětko tak mjenowane zrěčenje přichoda podpisali.

Budyšin (SN/BŠe). Stejnišći Alstoma w Budyšinje a Zhorjelcu stej najprjedy raz zaručenej. Zamołwite gremije a nawodnistwo su minjeny tydźeń wotpowědne tarifowe zrěčenje wo přichodźe podpisali. Z tym je ćahańca nachwilnje rozrisana, wšako chcyše nawodnistwo koncerna wjele dźěłowych městnow šmórnyć. To je nětko z blida. Přiwšěm matej stejnišći dojednanja spjelnić. Předewšěm dźe wo to, produktiwitu zwyšić a ekonomiske zaměry w přichodnych lětach docpěć. Najebać to ma dźěłarnistwo IG metal zrěčenje přichoda za wuspěch. „Za stejnišći we wuchodnej Sakskej je to wulka šansa. Tak móhłoj so dołhodobnje derje nastajić, wubědźowanjakmanosć skrućić a kolegam wěsty přichod zmóžnić“, zwurazni prěni społnomócnjeny IG metal wuchodneje Sakskeje Uwe Garbe. Nětko ma so chětře móžnosć wužiwać a na přichodźe zawodow dźěłać.