Budyšin (CS/SN). Tudyši měšćenjo njejsu jenož wćipni za kulisy pomnikow hladać. Ně, runje tak zajimuja so za industrijne a přemysłowe zawody. Z akciju „pózdnja změna“ mějachu Budyscy spěchowarjo hospodarstwa minjeny pjatk prawy čuch. Wosom turow běše spěšnje wuknihowanych, dohromady wopytachu ludźo 21 twornjow. Prěni raz bě twarc rězawow Perfecta pódla. Kónc 19. lětstotka załožena firma ma dołhu tradiciju. Za čas NDR dźěłaše tam hač do 1 200 ludźi, 800 mašinow běchu wob lěto hłownje na wuchodoeuropske wiki dodawali. Dźensa montěruje něhdźe sto sobudźěłaćerjow wob lěto 130 mašinow, kotrež na př. do USA, Francoskeje, Italskeje a na Filipiny wuwožuja. W 1980tych twarjachu nowe produkciske hale. Tam nastajene mašiny zwjetša dźensa hišće wužiwaja, wšako mějachu wudźěłki z NDR dołhe žiwjenje a běchu spušćomne. Krok po kroku pak wone mašiny, hdyž je trjeba, wobnowja.