FSV Budissa Budyšin – FSV Wacker Nordhausen 0:0

Zestawa domjacych: Ebersbach – Kunze, Patka, Hoßmang, Mack, Kloß (62. Gehrmann/88. Wockatz), Pfanne, Krawčik, Milde, Müller, Bönisch (92. Rosendo)

W dotalnych domjacych hrach koparjow Budissy Budyšin přećiwo Wacker Nordhausenej běchu hosćo Młynkec łuku stajnje jako dobyćer wopušćili. To pak chcychu chowancy trenarja Torstena Gütschowa změnić. Durinčenjo přewzachu hnydom komando. Prěnjej móžnosći přez Jeroma Prophetera a Tobiasa Beckera (5./11.) pak njeběštej wuspěšnej. Hosćićel měješe přiwšěm chětro wjele dźěła, zo by swoje wrota derje škitał. Wólny kop Lucasa Scholla je wrotar Maik Ebersbach dźeržał (21.). Po něhdźe poł hodźinje hrajneho časa wzachu hosćo nohu wot płunoweho pedala, a Budyšenjo so lěpje do hry namakachu. Wólny kop Jonasa Macka ze zdalenosće 25 metrow dźěše snadnje nimo wrotow (32.). Po wulkim boju běchu domjacy z 0:0 k połčasej prěni mjezycil docpěli.