ST Chróstawa – ST Marijina hwězda 2:1 (25:20, 21:25, 16:14)
Na třećim hrajnym dnju podachu so volleyballisća ST Marijineje hwězdy do Chróstawy pola Budestec. Tam wočakowaše jich najprjedy sylny domjacy cyłk, kotryž měješe w swojich rjadach dweju wurjadneju nadběhowarjow. Jeju blokować bě zaměr Pančičanskich muži, to pak so w prěnjej sadźbje scyła njeporadźi. Chróstawčenjo wuhrachu sej spěšnje tři do pjeć dypkow předskoka a je přez cyły čas tež dźeržachu. Klóšterscy hrajerjo skutkowachu hišće trochu zaspani, tak zo prěnju sadźbu z 20:25 zasłužbnje přěhrachu.
W druhej sadźbje bě jasne stopnjowanje trěbne, štož hóstni volleyballisća na zbožo tež činjachu. Wosebje blok steješe lěpje a hewak dobri hrajerjo z Chróstawy nadběhi zwjetša jenož hišće „kładźechu“. Na to so Pančičenjo nastajichu a jara wušiknje škitachu. Tak skónči so přechod 25:21 za Marijinu hwězdu.
