Awtor dźensa

Křesćan Korjeńk

„To tola móžno njeje, to tola być njemóže!“ Tajke wuprajenja słyšiš často, hdyž rěči so wo njewšědnym podawku, wo wěstej fazy abo wo njewočakowanym rozsudźe. Žiwjenje ma mnohe tajke situacije, ma nimale kóždy dźeń překwapjenki, z kotrymiž njejsmy ličili. A dokelž je to kolumna ze sportowej tematiku, pohladam z tohole městna raz do swěta sporta. Njeje wjace dołho do zahajenja olympiskich zymskich hrow w Južnej Koreji. W nimale wšitkich disciplinach běža poslednje přihoty a wotměwaja so wurisanja. Nastajene kriterije, normy, časy a zdale­nosće za kwalifikaciju su wšitkim sportowcam znate.

Druhdy pak dožiwiš swojorazne rjadowanja. Tak čitach njedawno, zo dóstanje sportowy partner krasnosmykarki Aljony Zawčenko, Bruno Massot, po dwójnym zwrěšćenju w rěčnym pruwowanju nětko tola staćanstwo Němskeje a smě při olympiskich hrach startować. Žane wopačne twjerdźenja hač je tam něchtó poslednje pruwowanje wobwliwował! A jeli staj na kóncu wuspěšnaj, potom bu wšitko prawje činjene!