Natwar Němske Pazlicy

– SJ Njebjelčicy 2:1 (1:1)

Zestawa hosći: Hahn – Hoelzel, Hanuza, Deleńk, Hrjehor, Pawlik, Kral, Ričel (75. Čornak), Lejnart, Haška, Korjeńk

W poslednjej hrě prěnjeje połserije 2017/2018 při derbyju pola načolnika tabulki wokrjesneje ligi-stafla II su Njebjelčenjo woprawdźe dobru kopańcu pokazali. Hosćićelski trenar Handrij Krawčik bě swojich chowancow derje nastajił a kóždemu jednotliwcej prawe sebjewědomje sobu dał. Tak je mustwo ze wšeho spočatka čile a w zhromadnej bojownosći spěšne a strašne nadběhi hosćićela wotwobarało. Nimo toho poradźi so agilnemu Handrijej Korjeńkej tón abo tamny strašny nadběh. Tak bu wón w 19. min. wot Wonnebergera potorhnjeny, ale po měnjenu sudnika to za čerwjenu kartu njedosahaše. W 40. min. Korjeńk přez prawu stronu běžo kulowatu kožu k 0:1 do wótreho kuta wrotow smokny. Po tym měrjachu so Njebjelčenjo dale na domjace wrota, zhubichu pak we srjedźnym polu njezbožownje bul. Tak poradźi so domjacym do přestawki wurunanje (45.) přez špěšny konter.