Awtor dźensa

Clemens Šmit

Hladajo na sport steji klětu wšitko w fokusu swětowych koparskich mišterstwow w Ruskej kaž tež olympiskich hrow w južnokorejskim Pyeongchangu. A dokelž so Wladimir Putin w měrcu zawěsće štwórty raz z ruskim prezidentom stanje, móžemy sej wěsći być, zo so pod jeho dirigatom kołowokoło hrow tež zaso wulki politiski brimborij wotměje. Kak politiske smědźa tajke wulkozarjadowanja scyła być, je dobre prašenje. Rozdaće minjenych olympiskich hrow do Sočija (Ruska) abo 2008 do Pekinga (China) rysuja hinaši wobraz, ale tež rozsud, swětowe koparske mišterstwa 2014 w Brazilskej, klětu w Ruskej a potom 2022 w Katarje wuhotować chcyć, jasnje pokazuja, kak politika a hospodarstwo w sporće sobu měšatej.