Prěnja hra wječora mjez volleyballistami z Chróstawy a MSV Budyšina 04 IV započa so po sćoplenskej fazy w 20.15 hodź. MSV Budyšin duel z 1:2 přěhra. Nětko běchu Sokoljo z města na rjedźe. Woni běchu so minjene měsacy a tydźenje krok po kroku polěpšili. To drje w tabulce spóznajomne njeje (0 dypkow), ale wašnje hraća je nětko wo wjele lěpše. Tež mustwo to tak widźi. Wosebje derje zamóchu při přećiwniskich a swójskich nadaćach poziciju dźeržeć. To k tomu wjedźeše, zo docpěchu přećiwnicy jenož mało dypkow z nadaćemi. Tež při saku su so Sokoljo při dlěšich bulowych fazach polěpšili. Tójšto razow nastachu dlěše hrajne situacije, w kotrychž bul tři abo štyri razy přez sak lětaše. Wobě partiji běštej wobhladanjahódnej. Jako mustwo Sokoł Budyšin dosć derje funguje. Kóždy běha za kóždeho. Druhdy pak teptaja sej sobuhrajerjo tež mjez sobu na noze, dokelž chcetaj na přikład dwaj k bulej. Prěnju hru přećiwo ST Chróstawje Sokoł z 0:2 (17:25, 11:25) přěhra a dru­hu tež z 0:2 (21:25, 20:25) přećiwo MSV Budyšinej 04 IV. Při měšćanskim duelu běštej wobě sadźbje wurunanej. Sokoł měješe wjele sebjewědomja.