Wojerowski FC – ST 1922 Radwor 2:3 (2:1)
Zestawa hosći: Wróbl – Wjeńka, Šěrak, Henke, Zähr, Mark (90.+1 Glücklich), Zimmermann, Bauer (74. Omran), Bejmak, Schulze, Kurjat (90. Hettasch)
Po tym zo bě tydźeń prjedy wjedra dla nimale kóžda hra wupadnyła, smědźachu so Radworscy koparjo sobotu we Wojerecach z tamnišim FC měrić. Hosćićel bě do hry jasny faworit, a tak tež druhi tabulki wustupowaše. Hižo z prěnim nadběhom w 3. min. klinkaše w klětce Fabiana Wróbla. Hosćo njeběchu mentalnje hišće na polu, a tak móžachu so Wojerowčenjo na lěwym boku přesadźić. Erik Lanzky přetwori. Wotnětka chowancy trenarja Pětra Bejmaka wojowachu. Hra bě wočiwidnje wurunana, tola zmylk w 26. min. wuži Kevin Kratschmer za domjacych k 2:0. Jenož pjeć mjeńšin pozdźišo pak posłuži Tom Schulze z perfektnej přihrawku Měrćina Kurjata, kiž w druhim pospyće na 2:1 skrótši. Hišće do połčasa potom kuriozna situacija před wrotami Wróbla. Po dalšim nadběhu Wojerowskich padny hrajer w šěsnatce, sudnik pak chcyše z wotkopom pokročować. Asistent při liniji jeho skorigowa a pokaza na jědnatku. Kaž hižo w zašłej hrě móžeše Wróbl třělwu wotwobarać.
